لوئردیر میں آپریشن، میجر سمیت پاک فوج کے 4 اہلکار شہید
پشاور: وفاق کے زیر انتظام قبائلی علاقے (فاٹا) میں دہشت گردوں کے خلاف آپریشن کے دوران خود کش دھماکے کے نتیجے میں پاک فوج کے ایک میجر سمیت 4 اہلکار شہید ہوگئے۔
پاک فوج کے شعبہ تعلقات عامہ (آئی ایس پی آر) کی جانب سے جاری کیے گئے بیان میں کہا گیا کہ لوئر دیر کے علاقے تیمر گرہ میں فورسز نے خفیہ اطلاع پر آپریشن کا آغاز کیا۔
پاک فوج کے مطابق کارروائی کے دوران 3 میں سے ایک دہشت گرد نے خود کو دھماکے سے اڑا لیا، جس کے نتیجے میں آپریشن کی سربراہی کرنے والے میجر علی سلمان، حوالدار غلام نذیر، حوالدار اختر اور سپاہی عبدالکریم شہید ہوگئے۔
آئی ایس پی آر کے مطابق میجر علی سلمان کا تعلق خفیہ ادارے سے تھا۔
مزید پڑھیں: داعش کے خاتمے کیلئے ’آپریشن خیبر فور‘ کا آغاز
آئی ایس پی آر بیان کے مطابق جھڑپ کے دوران ایک دہشت گرد کو ہلاک اور ایک کو گرفتار بھی کیا گیا۔
بعد ازاں شہید میجر علی سلمان اور حوالدار اختر کی نماز جنازہ کور ہیڈ کوارٹرز پشاور میں ادا کر دی گئی، جس میں کور کمانڈر پشاور، انسپکٹر جنرل (آئی جی) خیبرپختونخوا اور دیگر اعلیٰ حکام نے شرکت کی۔
دوسری جانب وزیراعظم شاہد خاقان عباسی نے 4 فوجی اہلکاروں کی شہادت پر گہرے دکھ کا اظہار کیا۔
وزیراعظم ہاؤس سے جاری ہونے والے بیان کے مطابق پاک فوج کے جانی نقصان پر وزیراعظم نے شہدا کے درجات کی بلندی کے لیے دعا کی اور لواحقین کے ساتھ ہمدردی کا اظہار کیا۔
یہ بھی پڑھیں: آپریشن خیبر فور کے تحت کامیابیاں، 13 دہشت گرد ہلاک
خیال رہے کہ پاک فوج نے گذشتہ ماہ 17 جولائی کو وفاق کے زیر انتظام قبائلی علاقے (فاٹا) کے سب سے مشکل علاقے راجگال میں دہشت گردوں کے خاتمے کے لیے رد الفساد کے تحت آپریشن خیبر فور کے آغاز کا اعلان کیا تھا۔
آئی ایس پی آر ترجمان میجر جنرل آصف غفور نے ایک پریس کانفرنس کے دوران بتایا تھا کہ پاک فوج نے آپریشن کا آغاز 2009 میں کیا تھا، جس میں پہلے باجوڑ، سوات اور اب مہمند ایجنسی کو کلیئر کیا گیا، ان کا دعویٰ تھا کہ 2014 میں شروع کیے گئے آپریشن ضرب عضب کے تحت اب تک سارا علاقہ کلیئر کرایا جاچکا ہے۔
لائیو ٹی وی