ہیکرز کا ایچ بی او پر حملہ،’گیم آف تھرونز‘ لیک کرنے کی دھمکی
کیا آپ بھی امریکی فینٹیسی ڈرامہ سیریز ’گیم آف تھرونز‘ کے مداح ہیں؟ اگر ہاں تو یقیناً آپ کو اس کے نئے سیزن کا شدت سے انتظار ہوگا، لیکن خبر یہ ہے کہ اس سیریز کے اسکرپٹ اور اقساط کو ہیک کرلیا گیا ہے۔
ایک رپورٹ کے مطابق ہیکرز نے ایچ بی او چینل پر حملہ کرتے ہوئے اس پر نشر ہونے والے بہت سے مقبول شوز کی اقساط قبل از وقت ریلیز کردیں جبکہ ’گیم آف تھرونز‘ کے مواد کو بھی چوری کرلیا ہے۔
ہیکرز نے متعدد رپورٹرز کو ایک گمنام ای میل بھیجی، جس میں تحریر کیا گیا کہ 'سائبر دنیا میں سب سے بڑی لیک ہونے جارہی ہے، اس کا نام کیا ہے، میں بتانا بھول گیا، یہ ایچ بی او اور گیم آف تھرونز ہے!!! آپ وہ پہلے خوش قسمت ہوسکتے ہیں جو لیک ہونے والے شو کو ڈاؤن لوڈ کرسکیں، انجوائے کریں اور اس خبر کو پھیلا دیں، جو بھی اس خبر کو بہتر انداز میں پھیلائے گا، ہم اس کے ساتھ انٹرویو کریں گے، ایچ بی او گِر رہا ہے‘۔
جس کے بعد ایچ بی او نیٹ ورک نے اپنا بیان ریلیز کرتے ہوئے اس خبر کی تصدیق کی، تاہم یہ نہیں بتایا گیا کہ ہیکرز کے پاس ان کا کون کون سا مواد موجود ہے، بیان میں لکھا گیا کہ ’ایچ بی او ہیکنگکا شکار ہوا ہے، ہم نے اس واقعے کی تحقیقات شروع کردی ہیں، ہم اپنے پاس موجود ڈیٹا کی حفاظت سنجیدگی سے کرتے ہیں‘۔
رپورٹ کے مطابق ہیکرز نے ڈیٹا کا 1.5 ٹیرا بائٹس حصہ چوری کرلیا، جس میں 'گیم آف تھرونز' کا وہ مواد بھی موجود ہے جو اب تک ریلیز نہیں کیا گیا، اس کے علاوہ بالرز اور روم 104 نامی شوز کی آئندہ ریلیز ہونے والی اقساط بھی موجود ہیں۔
ایچ بی او کے چیئرمین رچرڈ پلیپلر نے اس ہیکنگ کے بعد ملازمین کو ای میل کے ذریعے اس واقعے کے خلاف ایکشن لینے کا کہا۔
واضح رہے کہ اس وقت تک ’گیم آف تھرونز‘ کی کوئی قسط آن لائن لیک نہیں کی گئی۔
لائیو ٹی وی