بین الاقوامی کیمسٹری مقابلہ:کانسی کا تمغہ پاکستانی طالبہ کے نام
کراچی سے تعلق رکھنے والی طالبہ نے تھائی لینڈ میں منعقدہ کیمسٹری کے بین الاقوامی مقابلے میں کانسی کا تمغہ حاصل کرلیا۔ مقابلے میں امریکا، چین اور روس سمیت 75 سے زائد ممالک کے طلبا و طالبات نے حصہ لیا۔
اے ۔ لیول کی طالبہ ماہا ایوب پاکستان کے لیے یہ تمغہ تھائی لینڈ کے شہر نخون پوموم میں منعقدہ 49ویں انٹرنیشنل کیمسٹری اولمپیڈ (آئی سی ایچ او) میں حاصل کیا۔
یہ مقابلہ 6 سے 15 جولائی کے درمیان ہوا جس کے بعداس کے نتائج کا اعلان کیا گیا۔
ڈان سے بات کرتے ہوئے 19 سالہ ماہا ایوب کا، جو مقابلے میں حصہ لینے والی چند طالبات میں سے ایک تھیں، کہنا تھا کہ ’بین الاقوامی سطح پر پاکستان کی نمائندگی کرنا میرے لیے فخر کرنے سے کم نہیں، جبکہ دنیا کے چند بڑے ممالک کے لوگوں کے سامنے اپنے ملک کا پرچم تھامنے کا احساس ناقابل بیان ہے۔‘
دنیا کے مختلف ممالک سے تعلق رکھنے والے 297 طلبا و طالبات سے مقابلے کے لیے پاکستان کی دو ٹیمیں تشکیل دی گئی تھیں، جن میں سے 4 طلبہ پر مشتمل ایک ٹیم نے کیمسٹری اور 5 طلبہ پر مشتمل دوسری ٹیم نے فزکس کے مقابلے میں حصہ لیا، جس کا انعقاد انڈونیشیا کے شہر یوگاکارٹا میں ہوا۔
ماہا ایوب نے کہا کہ ’10 گھنٹے کے طویل وقت تک جاری رہنے والا یہ مقابلہ بہت سخت تھا، جو 5، 5 گھنٹے کے پریکٹیکل اور تھیوریٹیکل امتحانات پر مشتمل تھا۔‘
طلبا کو ملک کے تمام بڑے شہروں میں اسکریننگ ٹیسٹ کے بعد ’ایس ٹی ای ایم‘ کیریئر پروگرام کے تحت منتخب کیا گیا تھا۔
ہر مقابلے کے ٹاپ 50 طلبہ کو ان مضامین کی ٹریننگ کے لیے منتخب کیا گیا، جنہیں تین ہفتے ٹریننگ کیمپ میں گزارنے کے بعد مزید شارٹ لسٹ کیا گیا اور آخر میں بین الاقوامی مقابلے میں پاکستان کی نمائندگی کے لیے دو ٹیمیں منتخب کی گئیں۔
ماہا ایوب نے مزید کہا کہ ’اس مقابلے کے ذریعے ہمیں دنیا بھر کے کئی طلبا سے میل جوڑ بڑھانے کا موقع ملا، جس سے ہمیں عالمی حاضرین کے سامنے پاکستان کا مثبت تاثر پیش کرنے میں مدد ملی۔‘
لائیو ٹی وی