آرمی چیف کا بین الاقوامی فٹبالرز کے اعزاز میں استقبالیہ
آرمی چیف جنرل قمر جاوید باجوہ نے بین الاقوامی فٹبالرز کے اعزاز میں استقبالیہ دیا اور انہیں پاکستان آمد پر خوش آمدید کہا۔
پاک فوج کے شعبہ تعلقات عامہ (آئی ایس پی آر) کے مطابق بین الاقوامی فٹبالرز رونالڈینیو، رائن گِگز، رابرٹ پیریس، نکولس اینلکا، جارج بوٹینگ، ڈیوڈ جیمز اور لوئس با مورٹے نے آرمی چیف جنرل قمر جاوید باجوہ سے ملاقات کی۔
آرمی چیف نے بین الاقوامی فٹبالرز کا پاکستان آمد پر شکریہ ادا کرتے ہوئے کہا کہ پاکستان ایک پر امن اور کھیلوں سے محبت کرنے والا ملک ہے۔
انہوں نے کہا کہ ’کھیلوں سے امن کو فروغ ملتا ہے اور بین الاقوامی فٹبالرز کی پاکستان آمد سے پوری قوم بالخصوص نوجوان بہت خوش ہیں۔‘
پاکستان آنے والے فٹبالرز نے آرمی چیف کی حمایت اور دورے کے انعقاد پر شکریہ ادا کیا۔
ان کا کہنا تھا کہ ’پاکستان ایک خوبصورت ملک ہے اور ہم اس دورے سے لطف اندوز ہوں گے۔‘
جنرل قمر جاوید باجوہ نے امن اور کھیلوں کے فروغ کے لیے پاک آرمی کے اشتراک سے اس دورے کے انعقاد پر ’لیژر لیگ‘ کا بھی شکریہ ادا کیا۔
رونالڈینیو، دیگر فٹبالرز کی پاکستان آمد
قبل ازیں برازیل کے معروف فٹ بالر رونالڈینیو اور برطانیہ کے رائن گگز سمیت دنیا کے 7 بین الاقوامی فٹ بالرز دو نمائشی میچ کھیلنے پاکستان پہنچے۔
بین الاقوامی کھلاڑی لیژرز لیگ کی جانب سے ہفتہ (8 جولائی) کو کراچی میں جبکہ اتوار (9 جولائی) کو لاہور میں منعقد ہونے والے نمائشی مقابلوں میں شرکت کریں گے جبکہ آرمی چیف جنرل قمر جاوید باجوہ بین الاقوامی کھلاڑیوں کے اعزاز میں استقبالیہ بھی دیں گے۔
دبئی سے خصوصی پرواز کے ذریعے اسلام آباد کے بینظیر انٹرنیشنل ائرپورٹ پہنچنے والے فٹ بالرز میں رونالڈینیو اور رائن گگز کے علاوہ ڈیوڈ جیمز، جارج بوٹینگ، رابرٹ پیریس، لوئس بامورٹے اور نکولس اینلکا شامل ہیں۔
مزید پڑھیں: انگلش فٹبالر جان ٹیری بھی پاکستان آنے کیلئے رضا مند
عالمی شہرت یافتہ فٹ بالرز کو اسلام آباد کے بے نظیر انٹرنیشنل ائر پورٹ سے انتہائی سخت سیکورٹی میں دارالحکومت کے نجی ہوٹل میں پہنچایا گیا۔
دوستانہ میچ کی منتظم کمپنی ’لیژرز لیگ‘ کی جانب سے منعقدہ میچ میں شرکت کے لیے پاکستان آنے والے بین الاقوامی فٹ بالرز اسلام آباد میں اعلیٰ سیاسی و عسکری قیادت سے ملاقاتیں بھی کریں گے۔
بین الاقوامی کھلاڑیوں کو بینظیر انٹرنیشنل ائرپورٹ پر وی وی آئی پی پروٹوکول دیا گیا جبکہ ائرپورٹ پر سیکیورٹی کے انتہائی سخت انتظامات کیے گئے تھے۔
بین الاقوامی کھلاڑیوں کی سیکیورٹی کے لیے پاک فوج کے دستے بھی ائرپورٹ پر تعینات تھے۔
یہ بھی پڑھیں: پاک فوج کا رونالڈینیو اور ٹیم کو پاکستان آمد پرخوش آمدید
پاکستان آنے والے ان 7 بین الاقوامی کھلاڑیوں میں سے 2 کا تعلق برازیل، 2 کا تعلق برطانیہ جبکہ ایک فٹ بالر کا تعلق فرانس، ایک کا ہالینڈ اور ایک کا تعلق پرتگال سے ہے۔
پاکستانی اور غیرملکی فٹ بالرز پر مشتمل ٹیمیں رونالڈینیو اور رائن گگز کی قیادت میں میدان میں اتریں گی۔
یاد رہے کہ میچ کا حصہ بننے والے پاکستانی فٹ بالرز کو کراچی، لاہور اور اسلام آباد میں ہونے والے میچوں میں ان کی کارکردگی کی بنیاد پر منتخب کیا گیا ہے۔
لائیو ٹی وی