ایل او سی پر بھارتی فائرنگ، 5 شہری جاں بحق
مظفرآباد: آزاد جموں و کشمیر میں لائن آف کنٹرول (ایل اوسی) پر بھارتی فورسز کی شیلنگ کے نتیجے میں 5 شہری جاں بحق جبکہ 9 زخمی ہوگئے۔
پاک فوج کے شعبہ تعلقات عامہ (آئی ایس پی آر) کی جانب سے جاری ہونے والے بیان میں بھی بھارتی فوج کی بلااشتعال فائرنگ کی تصدیق کرتے ہوئے بتایا گیا کہ پاکستانی فوجی اہلکاروں کی جانب سے مؤثر جوابی کارروائی کی گئی۔
واضح رہے کہ 8 جولائی کو معروف کشمیری نوجوان رہنما اور حزب المجاہدین کے کمانڈر برہان مظفر وانی کی پہلی برسی کے موقع پر جہاں وادی میں کشمیری عوام کو شدید مشکلات کا سامنا ہے وہیں بھارتی فورسز کی جانب سے ایل او سی پر آزاد کشمیر کے مختلف علاقوں میں بھاری شیلنگ کا سلسلہ بھی جاری ہے۔
ضلع پونچھ کے ڈپٹی کمشنر راجا طاہر ممتاز کے مطابق 'عباس پور اور حاجرہ سیکٹرز میں بھارتی فورسز کی فائرنگ اور شیلنگ کا سلسلہ صبح 6 بجے سے شروع ہوا'۔
یہ بھی پڑھیں: برہان وانی کی برسی: مقبوضہ کشمیرمیں کرفیو نافذ،انٹرنیٹ سروس معطل
انہوں نے مزید بتایا کہ ٹیٹری نوٹ کراسنگ پوائنٹ کے نزدیک موجود گاؤں بھیرا کے 75 سالہ رہائشی محمد شریف شیلنگ کی زد میں آکر جاں بحق ہوگئے جبکہ ان کا گھر بھی مکمل طور پر تباہ ہوگیا۔
بزرگ شخص کے علاوہ ٹیٹری نوٹ میں 70 سالہ سسی بیگم بھی فائرنگ کی زد میں آنے کے بعد جانبر نہ ہوسکیں، بزرگ خاتون بٹال سیکٹر سے اپنے رشتے داروں سے ملاقات کے لیے ٹیٹری نوٹ آئی تھیں۔
ڈپٹی کمشنر کے مطابق اسی علاقے میں 35 سالہ ریاست اور 18 سالہ اقصیٰ افتخار بھی بھارتی فورسز کی اشتعال انگیزی سے زخمی ہوئے۔
دریں اثناء عباس پور سیکٹر میں مارٹر شیل کی زد میں آ کر 26 سالہ فائزہ سلیم جاں بحق جبکہ 22 سالہ ادیبہ اور 17 سالہ ماہ نور زخمی ہوگئیں، تینوں خواتین کا تعلق ایک ہی گھرانے سے تھا۔
ڈپٹی کمشنر کے مطابق ایک اور 35 سالہ خاتون عباس پور سیکٹر کے چافر گاؤں میں جاں بحق ہوئیں۔
عباس پور سیکٹر کے بتول اور چاترا گاؤں میں 16 سالہ رضوان حنیف اور 14 سالہ فیضان علی جبکہ چافر گاؤں میں 22 سالہ عبدیہ پروین بھی بھارتی فورسز کی اشتعال انگیزی کی زد میں آکر زخمی ہوگئیں۔
ڈپٹی کمشنر نے ابتدائی رپورٹس کے برخلاف متاثرین کی تعداد میں اضافے کا خدشہ بھی ظاہر کیا۔
مزید پڑھیں: ایل اوسی:بھارتی فوج کی شیلنگ سے ایک شخص جاں بحق
علاوہ ازیں نکیال سیکٹر میں بھی صبح سویرے ہونے والی فائرنگ سے 22 سالہ انیبہ جمشید شدید زخمی ہوئیں۔
نکیال پولیس اسٹیشن کے حکام نے ڈان کو بتایا کہ بھارتی فورسز کی فائر کی گئی ایک گولی انیبہ کے سر میں آلگی جس سے وہ شدید زخمی ہوئیں، جس کے بعد انہیں فوری طور پر ڈسٹرکٹ ہیڈکوارٹرز ہسپتال کوٹلی منتقل کیا گیا، تاہم دوران علاج زخموں کی تاب نہ لاتے ہوئے انیبہ جمشید بھی چل بسیں۔
بھارتی ڈپٹی ہائی کمشنر کی دفتر خارجہ طلبی
بعد ازاں دفتر خارجہ نے بھارتی ڈپٹی ہائی کمشنر کو طلب کرکے ایل او سی پر بھارتی فائرنگ کے نتیجے میں شہریوں کی ہلاکت پر شدید احتجاج کیا۔
ترجمان کی جانب سے بھارتی ڈپٹی ہائی کمشنر کو دیئے جانے والے احتجاجی مراسلے میں کہا گیا کہ بھارت کی جانب سے گذشتہ کئی ماہ سے مسلسل سیز فائر معاہدے کی خلاف ورزیوں کا سلسلہ جاری ہے۔
پاکستان کی جانب سے مطالبہ کیا گیا کہ بھارت ان خلاف ورزیوں سے باز رہے۔
واضح رہے کہ پاکستان اور بھارتی فوج کے درمیان کشمیر میں ایل او سی پر حالات کافی عرصے سے کشیدہ ہیں۔
گذشتہ ماہ 28 جون کو ضلع کوٹلی کے جنوبی علاقے نکیال سیکٹر پر بھارتی فورسز کی جانب سے فائرنگ کے نتیجے میں ایک شخص جاں بحق اور خاتون سمیت 3 افراد زخمی ہوگئے تھے۔
یہ بھی پڑھیں: ایل او سی فائرنگ: بھارتی ڈپٹی ہائی کمشنر کی دفترخارجہ طلبی
22 جون کو نکیال سیکٹر میں بھارتی فورسز کی فائرنگ سے ایک خاتون اور کم سن لڑکی زخمی ہوئی تھی جبکہ 15 جون کو ضلع بھمبر میں 2 افراد زخمی ہوئے تھے۔
یاد رہے کہ 12 جون کو کوٹلی کے علاقے تتہ پانی میں بھارتی فوج کی شیلنگ کے نتیجے میں دو نوجوان جاں بحق اور 3 زخمی ہوگئے تھے۔
حکام کے مطابق رواں برس جنوری سے اب تک بھارت لائن آف کنٹرول پر 400 سے زائد مرتبہ سیز فائر معاہدے کی خلاف ورزی کرچکا ہے، جبکہ گذشتہ برس یہ تعداد 382 تھی۔
لائیو ٹی وی