مولانا طارق جمیل کو غیرملکی پرواز سے آف لوڈ کردیا گیا
معروف مذہبی اسکالر مولانا طارق جمیل کو دبئی سے ٹورنٹو جانے کرنے والی غیر ملکی ایئرلائن کی پرواز میں سفر کرنے سے روک دیا گیا۔
واقعہ اس وقت سامنے آیا جب مولانا طارق جمیل معروف کرکٹ اسٹار شاہد آفریدی کے ہمراہ شاہد آفریدی فاؤنڈیشن کے چیریٹی ڈنر میں شرکت کے لیے اپنے اہلخانہ کے ہمراہ کینیڈا روانہ ہونے والے تھے۔
ذرائع کے مطابق مولانا طارق جمیل کو سفر سے روکنے کی وجہ ان کا 1 گھنٹہ 50 منٹ تاخیر سے پہنچنا تھا۔
ذرائع کا یہ بھی کہنا تھا کہ ایئرلائن کی جانب سے مولانا طارق جمیل کو متبادل ٹکٹ جاری کیا جاچکا ہے اور وہ 36 گھنٹوں میں کینیڈا روانہ ہوجائیں گے۔
مزید پڑھیں: کسٹم افسران کو مولانا طارق جمیل کا تبلیغی درس
دوسری جانب شاہد آفریدی کے مینیجر سے حاصل ہونے والی معلومات کے مطابق مولانا طارق جمیل کو کینیڈین حکام کی ہدایت پر سیکیورٹی کلیئرنس نہ ہونے کے سبب اماراتی ایئرلائن کی پرواز سے آف لوڈ کیا گیا، تاہم اس بات کی تصدیق نہیں ہوسکی۔
واضح رہے طارق جمیل ایک معروف پاکستانی مبلغ اور عالمِ دین ہیں، ان کی تبلیغی کوششوں کے باعث بہت سے گلوکار، اداکار اور کھلاڑی دینِ اسلام کی طرف راغب ہوچکے ہیں۔
لائیو ٹی وی