شاہراہ قراقرم پر ٹریفک حادثہ، 4 افراد ہلاک
حویلیاں کے قریب ایبٹ آباد سے راولپنڈی جانے والے تیز رفتار 22 وہیلر ٹرالر نے مخالف سمت سے آنے والے ٹرالر کو ٹکر مارنے کے بعد دو کاروں اور ایک وین کو کچل دیا جس کے نتیجے میں 4 افراد ہلاک ہوگئے۔
حادثہ شاہراہ قراقرم پر گاؤں لنگڑا موڑ کے قریب پیش آیا جس کے نتیجے میں 12 افراد زخمی بھی ہوئے۔
مخالف سمت سے آنے والا ٹرالر حویلیاں سے ایبٹ آباد جارہا تھا جبکہ حادثہ ہفتے کو علی الصبح پیش آیا۔
ہلاک ہونے والوں میں ایک خاتون بھی شامل ہیں،4 لاشوں اور 5 زخمیوں کو رورل ہیلتھ سینٹر حویلیاں جبکہ 3 زخمیوں کو ڈسٹرکٹ ہیڈکوارٹر ہسپتال ایبٹ آباد اور 4 زخمیوں کو ایوب میڈیکل کمپپلیکس منتقل کردیا گیا۔
یہ بھی پڑھیں: راولپنڈی: ٹریفک حادثے میں چھ ہلاکتیں
ڈی ایس پی حویلیاں خورشید تنولی نے جائے حادثہ پر ریسکیو کے عمل کی نگرانی کی، انہوں نے بتایا کہ حادثے کے بعد شاہراہ قراقرم پر ٹریفک جام ہوگیا تھا تاہم ریسکیو 1122 کے اہلکاروں نے حادثے کا شکار ہونے والی گاڑیوں کو کنارے کرکے ٹریفک کے لیے جگہ بنائی۔
ڈی ایس پی نے کہا کہ فی الحال حادثے کی حتمی وجہ نہیں بتائی جاسکتی تاہم یہ کہا جارہا ہے کہ ایبٹ آباد سے آنے والے ٹرالر میں کوئی مسئلہ تھا۔
ہسپتال ذرائع کا کہنا ہے کہ زخمیوں میں سے 3 کی حالت تشویش ناک ہے۔
لائیو ٹی وی