لاہور: خیبرپختونخوا کے وزیراعلیٰ پرویز خٹک کا کہنا ہے کہ پختونوں سے زیادہ محب وطن کوئی بھی نہیں ہے اور وہ ان کے ساتھ کسی بھی قسم کا امتیازی سلوک برداشت نہیں کریں گے۔

پختون ویلفیئر آرگنائزیشن کے ایک اجلاس سے خطاب کرتے ہوئے پرویز خٹک نے کہا کہ پختون پاکستانی ہیں اور پنجابیوں، سندھیوں اور بلوچیوں کو اپنا بھائی تصور کرتے ہیں۔

انھوں نے پختونوں کی رجسٹریشن کے حوالے سے پنجاب حکومت کے فیصلے کو تنقید کا نشانہ بناتے ہوئے کہا کہ پختون کسی قسم کا امتیازی سلوک برداشت نہیں کریں گے اور اسی وقت خود کو رجسٹر کروائیں گے جب پنجابی، سندھی اور بلوچی خود کو رجسٹر کروالیں گے۔

مزید پڑھیں:پختونوں کو 'ہراساں' کرنے کیخلاف مذمتی قرارداد منظور

انھوں نے سوال کیا کہ کیا وزیراعلیٰ پنجاب شہباز شریف ہم سے زیادہ پاکستانی ہیں؟

ساتھ ہی وزیراعلیٰ خیبرپختونخوا نے خبردار کیا کہ 'ہمیں دیوار سے نہ لگایا جائے ورنہ ہم باغی ہوجائیں گے'۔

پرویز خٹک نے کہا کہ مسلم لیگ (ن) کی حکومت پختونخوں کو اس لیے سزا دے رہی ہے کیونکہ ہم پاکستان تحریک انصاف (پی ٹی آئی) کے رکن اور حامی ہیں۔

یہ بھی پڑھیں:'حکومت پختونوں کو ہراساں کرنا بند کرے'

انھوں نے کہا کہ وہ بذات خود وزارت داخلہ کو پنجاب میں پختونوں سے ہونے والے امتیازی سلوک کے حوالے سے خط لکھیں گے۔

خیبرپختونخوا کے وزیراعلیٰ کا کہنا تھا کہ مسلم لیگ (ن) کی حکومت ملک میں اتحاد کے نعرے لگا رہی ہے لیکن حقیقت میں پختونوں کو کسی بھی جرم کے بغیر جیل کی سلاخوں کے پیچھے بھیجا جارہا ہے۔

مزید پڑھیں:پختونوں کو پنجاب میں رہنے کا پورا حق : رانا ثناء

ان کا کہنا تھا کہ پختون درحقیقت دہشت گردی سے سب سے زیادہ متاثر ہیں۔

پرویز خٹک نے کہا کہ ملک میں جب بھی کوئی دہشت گردی کا واقعہ ہوتا ہے تو سب سے زیادہ درد پختون ہی محسوس کرتے ہیں۔

یہ خبر 8 مارچ 2017 کے ڈان اخبار میں شائع ہوئی