آفریدی نے ڈیرن سیمی کے لاہور آنے کا اشارہ دے دیا
پشاور زلمی کے اسٹار بیٹسمین شاہد آفریدی نے ٹیم کے کپتان اور ویسٹ انڈیز کے اسٹار آل راؤنڈر ڈیرن سیمی کے فائنل کے لیے لاہور آنے کا اشارہ دے دیا۔
تاہم ساتھ ہی انہوں نے یہ بھی کہا کہ اس حوالے سے ’اچھی خبر‘ کا باضابطہ اعلان پشاور زلمی اور کراچی کنگز کے درمیان جمعہ کو کھیلے جانے والے پلے آف میچ کے بعد کیا جائے گا۔
دبئی میں میڈیا سے بات کرتے ہوئے شاہد آفریدی کا کہنا تھا کہ ’پہلے پلے آف میچ میں کوئٹہ گلیڈی ایٹرز سے ایک رن سے ہارنے کے باوجود ہماری کراچی کنگز کے خلاف انتہائی اہم میچ میں پورے جوش کے ساتھ پرفارمنس دینے کے لیے تیار ہے۔‘
انہوں نے کہا کہ ’میں کوئٹہ کی فتح کا پورا کریڈٹ ان کے باؤلر محمد نواز کو دیتا ہوں جنہوں نے دباؤ کے باوجود بہترین پرفارمنس دی۔‘
ان کا کہنا تھا کہ ’محمد نواز نے میچ کے اہم مرحلے میں 3 یارکرز ڈیلیوریز کیں اور کوئٹہ کی جھولی میں فتح ڈال دی۔‘
شاہد آفریدی نے کہا کہ ’پشاور زلمی کے تقریباً تمام کھلاڑی دوبارہ فارم میں آگئے ہیں جو کہ کراچی کے خلاف انتہائی اہم میچ کے لیے اچھا شگون ہے۔‘
ان کا کہنا تھا کہ ’ہماری ٹیم کا ہر کھلاڑی اپنا کردار جانتا ہے اور ہم پلے آف میچ میں کراچی کنگز کا سامنا کرنے کے لیے تیار ہیں۔‘
لائیو ٹی وی