پنجاب میں کریک ڈاؤن: 205 مشتبہ ملزمان گرفتار

ڈان اخبار شائع February 19, 2017

لاہور: پنجاب کے مختلف علاقوں میں قانون نافذ کرنے والے اداروں کی جانب سرچ آپریشن کے دوران گزشتہ 24 گھنٹوں کے دوران 205 مشتبہ ملزمان کو گرفتار کرلیا گیا، جن میں اکثریت افغان باشندوں کی ہے۔

پنجاب پولیس کے محکمہ انسداد دہشت گردی( سی ٹی ٹی) کے ترجمان کے مطابق پولیس اور انٹیلی جنس اداروں نے صوبے بھر میں پانچویں روز بھی سرچ آپریشن جاری رکھا، جس دوران دہشت گرد کارروائیوں میں ملوث مشتبہ ملزمان کو گرفتار کیا گیا۔

ترجمان کے مطابق خفیہ معلومات پر کیے گئے سرچ آپریشن سے خاطر خواہ نتائج برآمد ہوئے، جب کہ گرفتار کیے گئے مشتبہ ملزمان کو مزید تفتیش کے لیے نامعلوم مقامات پر منتقل کردیا گیا۔

پولیس اور خفیہ اداروں کی جانب سے بادامی باغ، رائے ونڈ، سول لائنز، پرانی انارکلی، گلشن راوی، گلبرگ، غالب مارکیٹ، نشتر کالونی، ساندہ، نصیر آباد اور ٹاؤن شپ سمیت دیگر علاقوں میں سرچ آپریشن کیا گیا۔

یہ بھی پڑھیں: پنجاب: دہشت گردی کا بڑا منصوبہ ناکام، 5 'دہشت گرد' ہلاک

ان علاقوں سے قانون اور سیکیورٹی نافذ کرنے والے اداروں نے 144 مشتبہ ملزمان کو حراست میں لے لیا، جب کہ پولیس نے چھاپوں کے دوران ایک کلاشنکوف، ایک رائیفل، 78 گولیاں اور 2 پستول بھی برآمد کرلیے۔

پولیس نے سرچ آپریشن کے دوران بائیومیٹرک مشینوں کا بھی استعمال کیا، جو افراد اپنی شناخت سے متعلق دستاویزات فراہم نہ کرپائے پولیس نے انہیں حراست میں لے لیا۔

دوسری جانب *درگاہ لعل شہباز قلندر * میں دھماکے کے بعد پولیس نے درگاہ بیبیاں پاک دامن کو بند کردیا، جب کہ درگاہ انتظامیہ کا کہنا ہے کہ درگاہ کو زائرین کے لیے کب کھولا جائے گا، اس حوالے سے کچھ نہیں کہا جاسکتا۔

نیشنل ایکشن پلان ( نیپ ) کے تحت قانون اور سیکیورٹی نافذ کرنے والے اداروں نے قصور، پتوکی اور چنیاں کے مختلف علاقوں میں کارروائی کرکے 19 افغان شہریوں سمیت 58 افراد کو حراست میں لے لیا۔

سیکیورٹی اداروں نے دعویٰ کیا ہے کہ پتوکی اور قصور کے علاقوں دین گڑہ اور نیاز نگر سے گرفتار کیے گئے افغان شہریوں سے غیر قانونی اسلحہ بھی برآمد کرلیا گیا۔