پاکستان کے نامور اداکار، ہدایت کار اور پروڈیوسر عدنان ملک نے اپنے 12 سالہ کیریئر میں بہت شاندار کام کیا، تاہم ان کا کہنا ہے کہ وہ ذاتی زندگی میں اپنے ڈرامے 'دل بنجارا' کے کردار جیسے ہی ہیں۔

عدنان ملک نے ڈان امیجز کو ایک انٹرویو میں اپنے کیریئر، ذاتی زندگی، ڈراموں اور کئی پہلووں پر بات کی۔

عدنان ملک کا ڈرامہ 'دل بنجارا' اس وقت ہم ٹی وی پر نشر کیا جارہا ہے، جس میں انہوں نے ایک فوٹوگرافر کا کردار ادا کیا۔

اس ڈرامے کا نام اس سے قبل 'جپسی' رکھا گیا تھا اور عدنان کے مطابق وہ اپنی ذاتی زندگی میں بھی جپسی ہی ہیں۔

مزید پڑھیں: عدنان ملک کی ٹی وی پر واپسی

عدنان ملک نے اپنے 12 سالہ کیریئر میں کئی فیلڈز میں کام کیا، جن میں ہدایت کاری، پروڈکشن، اداکاری اور فوٹو گرافی شامل ہے۔

ان کے ڈرامے 'دل بنجارا' میں صنم سعید اور میرا سیٹھی ان کے ہمراہ کام کررہی ہیں۔

اپنے کردار کے حوالے سے عدنان ملک نے بتایا کہ 'سکندر اصل زندگی میں، میں ہی ہوں، وہ ایک فوٹوگرافر ہے اور فلم پڑھنے سے قبل میں بھی ایک فوٹوگرافر ہی تھا، میرے والد کا شکریہ جنہوں نے مجھے میرا پہلا کیمرا 12 سال کی عمر میں دیا'۔

کردار کو ملنے والی تعریفوں پر عدنان نے بتایا کہ 'بہت لوگوں کے لیے اس ڈرامے کی کہانی کافی فلمی ہے، لیکن مجھے مثبت ردعمل مل رہا ہے، مجھے سیکھنے کو بہت کچھ ملا، اس کا میوزک کافی اچھا تھا'۔

بہت جلد ملنے والی مقبولیت کے حوالے سے عدنان ملک نے کہا کہ 'ایک اداکار ہونا اور ایک اسٹار ہونا دو بالکل مختلف چیزیں ہیں، میں جب بھی کبھی باہر جاتا ہوں تو لوگ مجھ سے سیلفی کا پوچھتے ہیں جس پر میرا جواب ہوتا ہے کہ کیوں آخر میں ہوں کون؟ اور کبھی کبھی لوگ مجھے پہنچانتے بھی نہیں صرف یہی کہتے کہ کیا آپ ٹی وی پر آتے ہیں'۔

یہ بھی پڑھیں: ’دل بنجارا‘ تین نوجوانوں کی کہانی

واضح رہے کہ عدنان ملک نے ماہرہ خان کے ساتھ ڈرامہ 'صدقے تمہارے' میں بھی کام کیا تھا۔

جب عدنان سے پوچھا گیا کہ وہ کونسا کام ہے اور کونسے اداکار ہیں جن کے ساتھ وہ کام کرنا چاہتے ہیں؟ تو ان کا کہنا تھا کہ 'ماہرہ خان کے ساتھ میری کیمسٹری بہت اچھی تھی، ان کے ساتھ دوبارہ کام کرنا بہترین ہوگا'۔

انہوں نے چند ہدایت کاروں کا بھی نام لیا جن میں سرمد کھوسٹ، جامی، مہرین جبار اور نبیل قریشی شامل ہیں۔

انہوں نے مزید کہا کہ وہ ہمایوں سعید کے ہمراہ بولی وڈ فلم رام لکھن کا ریمیک کرنا چاہیں گے، جبکہ صبا قمر جیسی بہترین اداکارہ کے ساتھ کام کرنا بھی خوشگوار موقع ہوگا۔