عامر خان کی برطانوی باکسر سے فائٹ کیلئے بات چیت
مشہور برطانوی باکسرز عامر خان اور کیل بروک مئی 2017 میں ایک دوسرے کے خلاف مقابلے کے لیے مشورے کررہے ہیں۔
بی بی سی نے اپنی ایک رپورٹ میں کیل بروک کے پروموٹرایڈی ہرن کے حوالے سے خبر دی ہے کہ دونوں برطانوی باکسرز کے درمیان فائٹ کے لیے بات چیت چل رہی ہے۔
پاکستانی نژاد عامر خان نے رواں سال کے اوائل میں کہا تھا کہ 30 سالہ باکسرکیل بروک ان سے مقابلے کے لیے کوئی بڑا نام نہیں ہے۔
عامر خان نے ٹویٹر پر اپنے تازہ پیغام میں کیل بروک کے ساتھ تصویر جاری کی اور کہا کہ 'کیل بروک کے چہرے پر ضرب لگانے والا پہلا شخص گیناڈی گولوفکن ہے اور اس کے ساتھ جو لڑکا کھڑاہے وہ کیل بروکس کے چہرے پر ضرب لگانے والا دوسرا آدمی ہے'۔
ہرن کا کہناہے کہ 'یہ مقابلے کا اچھا موقع ہے'۔
ان کا کہنا ہے کہ 'عامر چاہتا ہے کہ یہ مقابلہ ہو جبکہ کیل بروک بھی ایسا ہی چاہتا ہے اورہم مداحوں کے لیے ایک فائٹ رکھنا چاہتے ہیں'۔
ہرن نے کہا کہ یہ برطانوی مقابلہ 'مانچسٹر ارینا یا اولڈ ٹریفورڈ' میں ہوسکتا ہے۔
مقابلے کے حوالے سے بات کرتے ہوئے ان کا کہنا تھا کہ کیل اپنے آپ کو ثابت کر چکے ہیں، انھوں نے شان پورٹر کو شکست دی اور گولوفکن سے ایک اچھا مقابلہ کیا اور یہ صحیح وقت ہے'۔
یہ بھی پڑھیں: الواریز کے ہاتھوں عامر خان ناک آؤٹ
واضح رہے دونوں برطانوی باکسرز اپنے آخری مقابلوں میں شکست کھا چکے ہیں، بروک کو قازقستان سے تعلق رکھنے والے گولوفکن نے شکست دی تھی تاہم بروک نے پانچویں مرحلے تک مقابلہ کیا تھا جس کو خوب سراہا گیا تھا۔
دوسری جانب پاکستانی نژاد عامر خان کو میکسیکن باکسر ساؤل کنیلو الواریز نے چھٹے مرحلے میں ناک آؤٹ کیا تھا۔
دونوں باکسرز نے مقابلوں کے بعد کہا تھا کہ وہ آئندہ ویٹ کلاسیفیکیشن میں مقابلہ نہیں کریں گے۔
لائیو ٹی وی