فنٹاسٹک بیسٹس نے ناقدین پر بھی جادو کردیا
ہیری پوٹر سیریز کے جادو کے اثر میں گرفتار افراد کے لیے اس کی اسپن آف یا پریکوئل فلم 'فنٹاسٹک بیسٹس اینڈ ویئر ٹو فائنڈ دیم' 18 نومبر کو ریلیز ہورہی ہے جس کا انتظار دنیا بھر میں بے صبری سے کیا جارہا ہے۔
فلم کی ریلیز سے قبل اس کے بارے میں مختلف جریدوں کی جانب سے ریویوز بھی سامنے آگئے ہیں اور اگر آپ اس جادوئی ایڈونچر کو دیکھنے کا ارادہ کررہے ہیں تو اس بارے میں ناقدین کی آراء ضرور جان لیں۔
تاہم ہم یہ بتا دیں کہ بیشتر ناقدین اس کے جادو کا شکار ہوچکے ہیں، جس میں ہیری پوٹر سیریز میں جو زمانہ دکھایا گیا ہے، اس سے 70 سال پہلے کی کہانی کو بیان کیا گیا جس کا مرکزی کردار ایڈی ریڈ مائن نے ادا کیا ہے۔
اب ناقدین کی آراء جانیں :
یو ایس اے ٹوڈے
ڈائریکٹر ڈیوڈ یاٹس نے دلچسپ انداز سے مضحکہ خیز ہیرو اور میجک لوجسٹ نیوٹ اسکمیندر (ایڈی ریڈ مائن) کو متعارف کرایا، یہ ایک پراعتماد اور حیران حد تک مزاحیہ ایڈونچر ہے جس میں ہیری پوٹر سیریز کی بیشتر فلموں سے زیادہ کشش ہے، متعدد اقسام کے درندے حقیقی لگتے ہیں جبکہ ویژول ایفیکٹس کمال کے ہیں، مجموعی طور پر یہ دیکھنے کے لائق فلم ہے۔
ورائٹی
اس جریدے کا کہنا تھا کہ جادوئی چھڑیوں اور پیارے جانوروں کے نیچے فلم میں عدم رواداری اور غیرملکیوں سے نفرت کی تھیمز موجود ہیں جو کہ ہیری پوٹر کی فلموں میں نظر نہیں آتا۔
دی گارجین
برطانوی روزنامے نے تو اس فلم کو فائیو اسٹار دیتے ہوئے کہا 'یہ ایک بھرپور، خاص آرائش کی حامل اور پیچیدہ تفریحی فلم ہے جس میں سانسیں روک دینے والے ڈیجیٹل ایفیکٹس کے ساتھ ماضی کے نیویارک کو فلمایا گیا ہے، جے کے رولنگ اور ڈیوڈ یاٹس نے حیران کن حد تک اچھی فطرت، سادہ اور تفریح کن فلم دی ہے'۔
ٹیلیگراف
اس برطانوی اخبار نے چار اسٹارز دیتے ہوئے کہا 'ایک فلم جو کہ ایک جادوئی زو کیپر کے بارے میں ہے، غیر متوقع طور پر 2016 کے بڑے بلاک بسٹر کی شکل میں بدل سکتی ہے، حالانکہ اس میں امریکا کا تاریک دور پیش کیا گیا ہے مگر یہ یاد رکھنا چاہیے کہ اس دور میں امریکا کا یہی حال تھا'۔
انڈپینڈنٹ
اس اخبار کے ریویو میں کہا گیا کہ یہ فلم مسحور کردینے والے اسپیشل ایفیکٹس، مزاح اور جوش سے بھرپور ہے، کئی مواقع پر فلم کی کہانی کافی تاریک ہوجاتی ہے مگر پھر بھی یہ لوگوں کی توجہ متاثر نہیں کرتی، درحقیقت فنٹاسٹک بیسٹ کا جادو کہیں بھی کم نہیں ہوتا اور یہ جیتنے کی صلاحیت رکھتی ہے'۔
انٹرٹینمنٹ ویکلی
اس نے کافی سخت تبصرہ کرتے ہوئے لکھا 'یہ فلم ہیری پوٹر سیریز کی ہدایات دینے والے ڈیوڈ یاٹس نے بنائی، مگر یہ ایکس مین سیریز کا بچگانہ ورژن لگتا ہے، اس کے جادوئی اسپیشل ایفیکٹس آنکھوں میں آسانی سے بس جاتے ہیں مگر کیا وجہ ہے کہ فنٹاسٹک بیسٹ مضحکہ خیز حد تک بے جان لگتی ہے؟ آخر اس کی کاسٹ جادو کیوں نہیں بکھیر سکی؟ کیونکہ مرکزی کردار سے ہٹ کر باقی سب کی اداکاری حیران کن حد تک سپاٹ رہی'۔
ہولی وڈ رپورٹر
فنٹاسٹک بیسٹس یقیناً ہیری پوٹر کے پرستاروں اور نوجوانوں کو اپنی جانب کھینچے گی، جو اس کے تنوع اور اسپیشل ایفیکٹس کو سراہیں گے، مگر یہ انہیں اس بات پر قائل نہیں کرسکے گی کہ آخر جے کے رولنگ اور وارنر برادرز اسے پانچ اقساط میں پیش کرنے کا ارادہ کیوں رکھتے ہیں۔
دی ریپ (The Wrap)
اس کا کہنا تھا کہ اچھے ڈیزائن اور جادو کی بھرمار کے باوجود ہیری پوٹر کے پریکوئل میں جادوئی لمس غائب نظر آتا ہے۔
لائیو ٹی وی