اسلام آباد: وفاقی وزیر خزانہ اسحٰق ڈار نے انعامی بانڈز اور کرنسی نوٹ منسوخ کرنے سے متعلق افواہوں کو مسترد کردیا۔

ریڈیو پاکستان کی رپورٹ کے مطابق اسلام آباد سے جاری بیان میں اسحٰق ڈار نے کہا کہ 40 ہزار مالیت کے انعامی بانڈز اور 5 ہزار روپے مالیت کے کرنسی نوٹ کی منسوخی سے متعلق کوئی تجویز زیر غور نہیں۔

واضح رہے کہ چند روز قبل پاکستان پیپلز پارٹی (پی پی پی) کے سینیٹر عثمان سیف اللہ خان نے 1 ہزار اور 5 ہزار کے کرنسی نوٹوں پر پابندی عائد کرنے کے لیے سینیٹ میں تحریک پیش کی تھی۔

یہ بھی پڑھیں: پیپیلز پارٹی سینیٹر کی 5 اور 1 ہزار کے نوٹوں پر پابندی کی تجویز

سینیٹ کی قائمہ کمیٹی برائے خزانہ کے رکن سینیٹر عثمان سیف اللہ کا ایوان میں اظہار خیال کرتے ہوئے کہنا تھا کہ بڑے نوٹوں کے منی لانڈرنگ اور کرپشن میں استعمال ہونے کے امکانات زیادہ ہوتے ہیں۔

ہندوستان کی مثال دیتے ہوئے ان کا کہنا تھا کہ پوری دنیا میں بڑے کرنسی نوٹوں کی حوصلہ شکنی کی جارہی ہے اور بھارت نے حال ہی میں 500 اور 1 ہزار روپے کے کرنسی نوٹوں کو بند کردیا ہے، جبکہ یورپ میں 500 یوروز کا نوٹ مارکیٹ میں لے کر جانے پر پوچھ گچھ کی جاتی ہے۔

مزید جانیں: بھارت میں 500 اور 1000 کے نوٹوں پر پابندی

سینیٹر عثمان سیف اللہ کی جانب سے یہ تحریک ایک ایسے وقت میں پیش کی گئی جب حال ہی میں بھارتی حکومت نے ملک میں کالے دھن کے خلاف بڑا اقدام کرتے ہوئے 500 اور 1000 انڈین روپے کے نوٹوں کا استعمال ختم کرنے کا اعلان کیا۔

بھارتی حکومت کو توقع ہے کہ ان نوٹوں کی گردش رک جانے سے ملک میں کرپشن روکنے کا ایک اچھا موقع فراہم ہوگا۔