بابراعظم ٹیسٹ ٹیم میں شامل،حفیظ باہر
کراچی: پاکستان نے ویسٹ انڈیز کے خلاف ٹیسٹ سیریز کے لیے 14 رکنی ٹیم کا اعلان کردیا جس میں ون ڈے سیریز میں بہترین کارکردگی کا مظاہرہ کرنے والے بابراعظم اور محمدنواز کو پہلی دفعہ شامل کیا گیا ہے جبکہ محمد حفیظ جگہ بنانے میں ناکام ہوئے ہیں۔
چیف سلیکٹر انضمام الحق نے پہلے ٹیسٹ کے لیے ٹیم کا اعلان کرتے ہوئے کہا کہ بابراعظم سے ٹیسٹ کرکٹ میں اچھی کارکردگی کی امید ہے۔
انگلینڈ کے خلاف ٹیسٹ ٹیم کا حصہ رہنے والے محمد حفیظ، محمد رضوان اور افتخاراحمد کو ویسٹ انڈیز کے خلاف سیریز میں شامل نہیں کیا گیا ہے۔
انضمام الحق کا کہنا تھا کہ 'میرا کسی سے کوئی ذاتی اختلاف نہیں ہے اور کسی بھی کھلاڑی کو خارج نہیں کیا ہے اس لیے جیسے حالات ہوں گے اسی طرح ٹیم میں شامل کیا جائے گا اور اس ٹیم کے انتخاب میں کوچ اور کپتان کی رائےبھی شامل ہے'۔
یہ بھی پڑھیں: بابر اعظم، ظہیرعباس کے نقش قدم پر
قومی ٹیم کے تجربہ کار بلے باز محمد حفیظ کو ٹیم میں جگہ نہیں دی گئی ہے جبکہ ون ڈے سیریز میں اپنے جوہر دکھانے والے بابر اعظم ٹیم میں ان کی جگہ لیں گے۔
ان کا کہنا تھا کہ 'احمد شہزاد کو 3روزہ پریکٹس میچ میں موقع دیا ہے جبکہ سلمان بٹ اپنا پہلا سیزن کھیل ہے ہیں اور ہم انھیں مزید کھیلتے ہوئے دیکھنا چاہتے ہیں'۔
چیف سیلکٹر نے کہا کہ 'سلمان بٹ کی کارکردگی اچھی رہی تو اسے بھی موقع دیا جاسکتا ہے'۔
انضمام نے ٹیم سے اچھی کارکردگی کی توقع کرتے ہوئے کہا کہ ڈاکٹروں نے یونس خان کو دس دن آرام کا مشورہ دیا ہے اسی لیے وہ پہلے ٹیسٹ میں ٹیم کا حصہ نہیں ہوں گے تاہم دوسرے اور تیسرے ٹیسٹ میں وہ ٹیم کےساتھ ہوں گے۔
یونس خان ڈینگی کی شکایت کے باعث کچھ دن قبل نجی ہسپتال میں داخل ہوئے تھے تاہم وہ صحت یابی کے بعد اپنے گھر واپس جاچکے ہیں۔
محمد عامر والدہ کی طبیعت کی خرابی کے باعث ایک روزہ سیریز ادھوری چھوڑ کر واپس آئے تھے اب وہ پیر کو واپس متحدہ عرب امارات جائیں گے اور ٹیم کا حصہ ہوں گے۔
مزید پڑھیں: پاکستان کی ویسٹ انڈیز کودوسری وائٹ واش شکست
ٹیسٹ ٹیم میں پہلی دفعہ شامل ہونے والے محمد نواز کے حوالے سے انضمام کا کہنا تھا کہ 'نواز کا فرسٹ کلاس کرکٹ میں اچھا ریکارڈ ہے جبکہ وہ اچھی بیٹنگ کے ساتھ باؤلنگ بھی اچھی کرتے ہیں'۔
پاکستان اور ویسٹ انڈیز کے درمیان سیریز کا پہلا میچ 13 اکتوبر کو شروع ہوگا جو ڈے اینڈ نائٹ کھیلا جائے گا اور یہ میچ دونوں ٹیموں کے لیے پہلا ڈے اینڈ نائٹ ٹیسٹ میچ ہوگا۔
قبل ازیں پاکستان ٹیم نے ویسٹ انڈیز کو ٹی ٹوئنٹی اور ایک روزہ سیریز میں وائٹ واش شکست دی تھی اور قومی ٹیم ٹیسٹ سیریز میں بھی وائٹ واش کرکے درجہ بندی میں اپنی پہلی پوزیشن کو برقرار رکھنے کا عزم ظاہر کرچکی ہے۔
ویسٹ انڈیز کے خلاف پاکستانی ٹیم ان کھلاڑیوں پر مشتمل ہوگی، یونس خان دوسرے ٹیسٹ سے ٹیم میں شامل ہوں گے جس کے بعد 15 رکنی ٹیم مکمل ہوگی۔
مصباح الحق (کپتان)، اظہرعلی، سمیع اسلم، اسدشفیق، بابراعظم، محمدنواز، سرفرازاحمد، یاسرشاہ، محمد عامر، وہاب ریاض، سہیل خان، عمران خان، راحت علی، ذوالفقار بابر
لائیو ٹی وی