خصدار: صوبہ بلوچستان کے ضلع خضدار میں قومی شاہراہ پر تیز رفتار بس کھائی میں جاگری جس کے نتیجے میں 11 افراد ہلاک ہوگئے۔

خضدار میں حادثہ قومی شاہراہ پر اس وقت پیش آیا جب مسافر بس کوئٹہ سے کراچی جارہی تھی۔ حادثے میں خواتین و بچوں سمیت 24 سے زائد افراد زخمی بھی ہوئے۔

حادثے کے بعد زخمیوں اور لاشوں کو سول ہسپتال منتقل کیا گیا، جہاں 4 زخمیوں کی حالت تشویشناک بتائی جاتی ہے۔

حادثے کے وقت بس میں 40 افراد سوار تھے۔

لیویز حکام کے مطابق بس کوئٹہ سے کراچی جارہی تھی کہ اسی دوران تیز رفتاری کے باعث اسے حادثہ پیش آیا۔

رواں سال کے اوائل میں بلوچستان کے ہی ضلع مستونگ میں 2 روڈ حادثوں میں فرنٹیئر کور (ایف سی) کے 3 اہلکاروں سمیت 7 افراد ہلاک ہوئے تھے۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔