معروف جاپانی کمپنی ٹویوٹا نے ایک انوکھی گاڑی تیار کرلی ہے جس کو دیکھ کر یقین نہیں ہوتا کہ وہ چل بھی سکتی ہے۔

جی ہاں یہ ہے ایک کانسیپٹ کار جو لگ بھگ مکمل طور پر لکڑی سے تیار کی گئی ہے۔

اور سب سے اچھی بات یہ ہے کہ اسے سڑکوں پر دوڑایا بھی جاسکتا ہے۔

ٹویوٹا نے یہ گاڑی میلان ڈیزائن ویک کے لیے تیار کی ہے جو 12 سے 17 اپریل تک جاری رہے گا۔

دو نشستوں پر مبنی اس گاڑی کی تیاری کے لیے جاپانی لکڑی کا استعمال کیا گیا ہے اور اسے سیٹسونا کا نام دیا گیا ہے۔

کمپنی کے مطابق گاڑی کی تیاری کے لیے لکڑی کے ہاتھ سے تیار کردہ 86 پینلز کو استعمال کیا گیا ہے اور کیلوں کی بجائے ایک روایتی طریقے سے آپس میں جوڑ دیا گیا ہے۔

اگرچہ یہ گاڑی چلائی جاسکتی ہے مگر اسے سڑکوں پر چلانا غیرقانونی ہوگا کیونکہ یہ لکڑی سے تیار کردہ ہے۔

اس سے پہلے ٹویوٹا کی لگژری گاڑیاں بنانے والی ذیلی کمپنی لیکسز نے اورگیمی الیکٹرک کار تیار کی تھی ، یعنی مکمل طور پر چلنے کے لائق الیکٹرک سیڈان جسے گتے سے بنایا گیا تھا۔

اس مقصد کے لیے کمپنی کے ڈیزائنرز نے گتے کی 1700 شیٹس کو لیزر سے کاٹ کر کسی گاڑی کے ڈیجیٹل ماڈل کی شکل دی اور پھر انہیں ووڈ گلیو کی مدد سے جوڑ دیا گیا۔

ڈیزائننگ سے لے کر تیاری تک کا کام سننے میں تو آسان لگ رہا ہے مگر اس کے لیے پورے تین ماہ لگے۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔