کراچی: وزیر بلدیات سندھ جام خان شورو نے کہا کہ شہر قائد میں بغیر ڈھکن والے گٹروں کے خلاف چلنے والی مہم کے پیچھے سیاسی عزائم ہیں۔

واضح رہے کہ مارکیٹنگ کے شعبے سے تعلق رکھنے والے عالمگیر خان نے چند روز قبل ایک مہم شروع کی تھی جس میں انہوں نے کراچی کے مختلف علاقوں میں بغیر ڈھکن والے گٹروں کا تعین کرتے ہوئے ان کے قریب وزیر اعلیٰ سندھ سید قائم علی شاہ کا خاکہ بنایا اور ان سے درخواست کرتے ہوئے’فکس اٹ‘ (اسے ٹھیک کرو) لکھا۔

ڈان نیوز سے گفتگو کرتے ہوئے وزیر بلدیات کا کہنا تھا کہ وہ کراچی کے مختلف علاقوں میں سندھ حکومت کی ڈھکن لگانے کی اپنی مہم کی خود نگرانی کررہے ہیں۔

انہوں نے کہا کہ جہاں جہاں مسائل ہیں ان کی نشاندہی کی جائے، مسئلہ فوری حل کیا جائے گا ۔

انہوں نے کہا کہ معاملے کو سیاسی رنگ دینا مناسب نہیں، یہ پورے پاکستان کا مسئلہ ہے، سیاسی جماعتوں کے رہنماؤں کی تصاویر لگانا درست اقدام نہیں۔

انہوں نے دعویٰ کیا کہ ڈھکن لگانے کی سندھ حکومت کی مہم گزشتہ ایک ہفتے سے جاری ہے اور متعدد مقامات کے مسائل حل کیے گئے ہیں۔

انہوں نے یہ بھی دعویٰ کیا کہ یہ عالمگیر خان کی مہم ان کی حکومت کی مہم کے بعد شروع کی گئی۔

واضح رہے کہعالمگیر خان پاکستان تحریک انصاف (پی ٹی آئی) کے سابق عہدیدار ہیں۔

ان کی اس مہم کی ویڈیو اور تصاویر جلد سوشل میڈیا پر پھیل گئیں اور ہزاروں لوگوں نے اسے سراہا۔

عالمگیر خان نے ڈان اخبار سے بات کرتے ہوئے پولیس کی جانب سے ہراساں کیے جانے کے واقعات کا ذکر کرتے ہوئے کہا کہ پولیس نے اس مہم کے حوالے سے غلط ردعمل دیا اور یہ سب حکام کی ایما پر کیا جارہا ہے۔

ان کا کہنا تھا کہ فیروز آباد پولیس کے ایک انسپکٹر کی جانب سے ان کے والد کو فون آیا جس میں ان سے کہا گیا کہ ان کی گاڑی سے شارع فیصل پر ایک حادثہ ہوا ہے، اس لیے پولیس اسٹیشن میں حاضری دیں۔

سوشل میڈیا پر چلائی جانے والی ان کی اس مہم کا ذکر اُس وقت زیادہ ہونے لگا جب قائم علی شاہ نے اس کا نوٹس لیتے ہوئے کمشنر کراچی کو دو روز میں مسئلے کے حل کی ہدایت کی۔