گوگل نے سال کے اختتام پر اپنی سالانہ فہرست کا اعلان کیا اور دنیا بھر کے ساتھ ساتھ پاکستان میں لوگوں کے سرچ رجحان کی فہرست بھی جاری کردی ہے۔

ہوسکتا ہے کہ آپ کے لیے یقین کرنا مشکل ہو لیکن پاکستانی عوام نے گوگل پر جس شخصیت کو سب سے زیادہ سرچ کیا وہ عمران خان کی سابق اہلیہ ریحام خان ہیں۔

اسی طرح دوسرے نمبر پر کرنسی اسمگلنگ کیس میں پھنسی سپر ماڈل ایان علی موجود ہیں جبکہ تیسرے نمبر پر بولی وڈ اداکارہ ایمی جیکسن کے بارے میں پاکستانیوں کو تجسس رہا ہے۔

انڈین ماڈل کرشمہ تننا بھی پاکستان میں سرچ کی جانب اہم شخصیت رہی اور چوتھے نمبر پر موجود ہیں جبکہ ڈائریکٹر میرا راجپوت کے حصے میں پانچواں نمبر آیا۔

رئیلٹی ٹی وی شو بگ باس نائن میں شریک مندانا کریمی چھٹے پر کھڑی ہیں تو اٹلی سے تعلق رکھنے والے مشہور کیمیا دان اور ماہر طبیعات ایلیسینڈرو وولٹا (1745-1827) ساتویں نمبر پر رہے۔

انڈین اداکار گوتم گلاٹی پاکستان میں سرچ کے حوالے سے 8 ویں، قندیل بلوچ 9 ویں اور کینیڈا کے نومنتخب وزیراعظم جسٹن ٹروڈو 10 ویں نمبر پر رہے۔

اسی طرح اگر ویب سرچنگ کی بات ہو تو پاکستانیوں کو سب سے زیادہ جستجو وائی ٹی پاک کی رہی جس کے بعد بگ باس 8 اور بجرنگی بھائی جان بالترتیب دوسرے اور تیسرے نمبر پر رہے۔

کم کم بھاگیہ نامی انڈین ڈرامہ چوتھے جبکہ سلمان خان کی ایک اور فلم پریم رتن دھان پایو کو پاکستان میں پانچواں نمبر حاصل ہوا۔

عامر خان کی گزشتہ سال ریلیز ہونے والی فلم پی کے 2015 میں بھی بہت زیادہ سرچ کی گئی اور چھٹا نمبر لے اڑی جبکہ آئی سی سی ورلڈ کپ 7 ویں نمبر پر رہا۔

ہولی وڈ فلم فاسٹ اینڈ فیوریس 8 ویں، انڈین ڈرامہ میری عاشقی تم سے ہی 9 ویں اور بگ باس نائن 10 ویں نمبر پر رہے۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔