گلگت بلتستان: گلگت کی انسداد دہشت گردی کی عدالت نے متحدہ قومی موومنٹ (ایم کیو ایم) کے قائد الطاف حسین کو سیکیورٹی اداروں کے خلاف متنازع تقریر پر 81 برس قید اور 24 لاکھ روپے جرمانے کی سزا سنادی۔

ایم کیو ایم قائد الطاف حسین کے خلاف متنازع تقریر پر گلگت بلتستان میں 9 مقدمات قائم ہیں جن پر عدالت نے 21 ستمبر کو فیصلہ محفوظ کیا تھا۔

انسداد دہشت گردی کی عدالت نے تمام مقدمات میں فیصلہ سناتے ہوئے الطاف حسین کو متنازع تقریر پر 81 سال قید اور 24 لاکھ روپے جرمانے کی سزا سنائی۔

یہ پڑھیں : الطاف حسین پر مقدمات کی تعداد 100 سے تجاوز

عدالت نے متعلقہ اداروں کو الطاف حسین کی اندرون اور بیرون ملک تمام جائیداد ضبط کرکے انہیں نیلام کرنے کا بھی حکم دے دیا۔

واضح رہے کہ الطاف حسین کے خلاف اشتعال انگیز تقریر پر ملک بھر میں 100 سے زائد مقدمات قائم کیے گئے ہیں۔

یہ بھی پڑھیں : الطاف حسین کی تقاریرکی لائیو کوریج پر پابندی

ایم کیو ایم کے قائد نے رواں برس جولائی میں اپنے ایک خطاب میں ہندوستان کی خفیہ ایجنسی 'را' سے مدد کرنے کی بات کی تھی جبکہ انھوں نے پاک فوج پر بھی تنقید کی تھی۔

بعد ازاں لاہور ہائی کورٹ نے الطاف حسین کی تقاریر کی لائیو کوریج پر پابندی عائد کردی تھی۔