منگل کی صبح جب میں سو کر اٹھا تو ایک دل دہلا دینے والی خبر میرا انتظار کر رہی تھی: کراچی کے ایک اسکول میں دو بچوں کی ہلاکت کی خبر۔ ابتدائی اطلاعات کے مطابق جب ان بچوں کے والدین نے ان کی محبت تسلیم کرنے سے انکار کیا تو ان دونوں نے خود کشی کر لی۔

اس حادثے کے بارے میں سوچنا بھی میرے لیے نہایت تکلیف دہ ہے۔ یوں تو پولیس ابھی بھی شواہد کی جانچ پڑتال کر رہی ہے لیکن اس حادثے نے ایک سوال کو جنم دیا ہے، "اس کے لیے ذمہ دار کس کو ٹھہرایا جائے؟"

والدین؟ معاشرہ؟ میڈیا؟ مخلوط تعلیم؟ اسلحہ کلچر؟ کون ذمہ دار ہے؟

یہ واقعہ بھلے کتنا ہی اچھوتا کیوں نہ ہو، اوپر موجود کسی بھی چیز کو اس کا اکلوتا ذمہ دار قرار نہیں دیا جا سکتا۔ ابھی تفصیلات آنی باقی ہیں، مگر میرا خیال ہے کہ یہ ایک موزوں وقت ہے کہ ہم اپنے معاشرے، اور خاص طور پر والدین کی تربیت سے متعلق مسائل پر بات کریں۔

1۔ "مخلوط تعلیم ذمہ دار ہے":

ہمارے سامنے دو بچوں کی اندوہناک موت کا واقعہ ہے۔ عام طور پر لوگ یہی کہیں گے کہ یہ مخلوط تعلیم کی وجہ سے ہے، اور ہماری 'اخلاقی قدروں' کے برخلاف لڑکوں اور لڑکیوں کا میل جول اس کا ذمہ دار ہے۔ مذہبی دلیل اپنی جگہ، آئیں اسے ایک مختلف زاویے سے دیکھتے ہیں۔

پڑھیے: کمسن طلبہ کی خود کشی: پستول لڑکی لائی تھی

میں نے سندھ کے ایک مقامی اخبار میں تین سال کام کیا ہے، جہاں میں اندرونِ سندھ کی خبریں لکھا کرتا تھا۔ مجھے ہمیشہ حیرانی ہوتی تھی کہ گھر سے بھاگنے (اور پھر کاروکاری میں مارے جانے یا کورٹ سے تحفظ کی اپیلیں کرنے) والے جوڑوں کے زیادہ تر واقعات اندرونِ سندھ کے دیہی علاقوں سے رپورٹ ہوتے تھے، جہاں مخلوط تعلیم یا صنفِ مخالف سے میل جول کا کوئی تصور نہیں۔

ان علاقوں کے لوگ کھلے عام صنفِ مخالف سے بات تک نہیں کر سکتے، لیکن پھر بھی وہ محبت کرنے اور گھر سے بھاگ نکلنے میں کامیاب رہتے ہیں۔ اگر مخلوط تعلیم کے بغیر اس طرح کے واقعات پیش آئیں تو پھر کس کو ذمہ دار ٹھہرانا چاہیے؟ حقیقت میں ان علاقوں میں حد سے زیادہ پابندیوں اور پسند کی شادیوں کی شدید مخالفت ان واقعات کو جنم دیتی ہے۔

دیہی علاقوں کا موازنہ شہروں سے کریں تو آپ دیکھیں گے کہ شہروں میں گھر سے بھاگنے کے واقعات کم ہوتے ہیں کیونکہ یہاں پر لوگوں کو اپنی پسند سے شادی کرنے کی نسبتاً زیادہ اجازت ہوتی ہے۔ اس لیے صرف مخلوط تعلیم کو ذمہ دار ٹھہرانا درست نہیں ہے۔

2۔ 'میڈیا ذمہ دار ہے':

کئی تحقیقات نے یہ بات ثابت کی ہے کہ ٹی وی پروگرامز بچوں کی نفسیات پر بے پناہ اثرانداز ہوتے ہیں۔ ترقی یافتہ ممالک میں ٹی وی پروگرامز کے لیے لیبل وضع کیے گئے ہیں تاکہ والدین اپنے بچوں کو وہ پروگرام دیکھنے سے روک سکیں جنہیں دیکھنے سے ان کی شخصیت پر منفی اثر ہو سکتا ہو۔ لیکن ترقی یافتہ ممالک میں بھی والدین اس پر مکمل عملدرآمد نہیں کر پاتے، جبکہ ہمارے ملک میں تو والدین کو اس بارے میں علم بھی نہیں کہ ٹی وی پروگرامز کے بارے میں اس طرح کی پابندیاں وجود رکھتی ہیں۔

پڑھیے: لائیو کوریج کا چورن

جب میں اسکول میں تھا تو ہمارے وقت کے سب سے مشہور دو ویڈیو گیمز جی ٹی اے سین اینڈریاز اور میکس پین 2 ہم سب ہی نے کھیل رکھے تھے۔ ان دونوں ہی ویڈیو گیمز کی ریٹنگ "M"، یعنی میچور (بالغوں کے لیے) ہے، اور انہیں صرف 17 سال سے زائد عمر کے بچوں کو کھیلنا چاہیے کیونکہ ان ویڈیو گیمز میں خون، سخت تشدد، غلط زبان، جنسی مناظر، اور منشیات کا استعمال دکھایا جاتا ہے۔

مثالی طور پر تو ہمیں ہماری عمر کے حساب سے ان ویڈیو گیمز تک رسائی نہیں ہونی چاہیے تھی، لیکن ہمیں رسائی تھی، اور ان ویڈیو گیمز نے ضرور اپنے منفی اثرات ہمارے اذہان پر ڈالے ہوں گے۔ ظاہر ہے جب ماہرینِ نفسیات کسی ویڈیو گیم یا فلم کی ریٹنگ اور اسے دیکھنے کے لیے عمر کی حد مقرر کرتے ہیں، تو یہ بے وجہ تو نہیں ہوتا۔ نوجوان ذہن ان ویڈیوز میں دکھائے گئے تشدد سے باآسانی متاثر ہوجاتے ہیں لہٰذا والدین کو اپنے بچوں پر نظر رکھنی چاہیے کہ وہ انٹرنیٹ پر کیا کر رہے ہیں اور ٹی وی پروگرامز سے کیا سبق حاصل کر رہے ہیں۔

3۔ 'والدین ذمہ دار ہیں':

جی ہاں، بہت حد تک والدین ہی ذمہ دار ہیں۔ گھر پر اسلحہ رکھنا اور اس تک بچوں کی آسانی سے رسائی ہونا آخر کس کی غلطی ہے؟ حقیقت میں تو بلاوجہ گھر پر اسلحہ رکھنا ہمارے اسی اسلحہ کلچر کی دین ہے، جو ہمارے ملک کی رگوں میں سرایت کر چکا ہے۔

والدین اس چیز کے لیے بھی ذمہ دار ہیں کہ ان کے بچے انٹرنیٹ پر کیا کرتے اور دیکھتے ہیں۔ میں نے ایک دفعہ امریکی حکومت کا جاری کردہ ویڈیو پیغام دیکھا تھا جس میں والدین پر زور دیا گیا تھا کہ وہ گھر میں کمپیوٹر ایسی جگہ پر رکھا کریں جہاں پر ہر کوئی اسے دیکھ سکے، تاکہ بچے کچھ چھپا نہ سکیں۔ ویڈیو میں والدین سے یہ بھی کہا گیا تھا کہ اگر ان کے بچے انہیں اکیلا چھوڑ دینے کے لیے بحث کریں، تو پیچھے ہٹ جانے کے بجائے اپنی بات منوانی چاہیے۔

صرف بچوں پر نظر رکھنا نہیں، بلکہ والدین کی ذمہ داری ہے کہ وہ اس مشکل اور تباہ کن دور میں اپنے بچوں کی جسمانی ضروریات کے ساتھ ساتھ ان کی ذہنی اور جذباتی صحت پر بھی دھیان دیں۔

پڑھیے: طلبہ کی 'خودکشی' : مزید خطوط و ڈرائنگز برآمد

میری عمر اور مجھ سے 10 سال چھوٹے بچوں کے والدین ضرور 1950 اور 1960 کی دہائی کے ہوں گے۔ ان والدین کو یہ سمجھنا چاہیے کہ یہ دور ان کے دور سے بہت مختلف ہے۔ میڈیا، ٹیکنالوجی، اسکول، ماحول، سب کچھ مختلف ہے۔ بچوں میں خودکشی کے رجحانات اب پہلے سے کہیں زیادہ ہیں۔ ہم نے اپنے بچوں کی صرف جسمانی ضروریات پوری کرنا اپنی ذمہ داری سمجھ لیا ہے، مگر ان کے جذبات پر توجہ نہیں دی جاتی۔ اسی لیے بچے اپنے محسوسات اپنے والدین کے بجائے باہر والوں کو بتاتے ہیں۔ اب یہ باہر والا انسان کے روپ میں فرشتہ بھی ہوسکتا ہے، اور انسان کے روپ میں بھیڑیا بھی۔

میری تمام والدین سے گذارش ہے کہ اپنے بچوں کو سمجھیں: ان کی خواہشات، احساسات، اور اس کے خیالات کو سمجھیں۔ اگر وہ کہتے ہیں کہ وہ کسی سے پیار کرتے ہیں، اور کسی انسان، کسی چیز، پلے اسٹیشن، لیپ ٹاپ، یا کسی بھی چیز کے لیے کسی کو قتل کر دیں گے یا خود کو ختم کر لیں گے، تو اسے سنجیدگی سے لیں۔

اگر آپ ان کی کوئی بات پوری نہیں کر سکتے، تو انہیں نرم انداز میں سمجھائیں، اور اپنے فیصلے کے حق میں دلائل دیں۔ تیز آواز میں بات کرنا، غصہ کر کے ان سے اپنی خواہش دبانے کو کہنا، یا ان کی بات پر توجہ نہ دینا بچوں میں منفی جذبات کو جنم دیتا ہے۔ کچھ بچے اس طرح دہل جاتے ہیں، لیکن زیادہ بے خوف بچے کبھی کبھی دلبرداشتہ ہو کر غلط قدم بھی اٹھا بیٹھتے ہیں۔

کراچی کے ان دو بچوں کے نام

کھل کے گل کچھ تو بہار اپنی صبا دکھلا گئے

حسرت ان غنچوں پہ ہے، جو بن کھلے مرجھا گئے

انگلش میں پڑھیں.