لاہور: پاکستان ہاکی فیڈریشن کے سیکریٹری رانا مجاہد نے بھی اپنے عہدے سے مستعفی ہونے کا فیصلہ کرلیا۔

ان کے فیصلے سے نو منتخب پی ایچ ایف صدر بریگیڈئیر (ر) خالد سجاد کھوکھر کا ہم خیال لوگوں کے ساتھ کام کرنے کا راستہ ہموار ہو جائے گا۔

رانا بدھ کو اسلام آباد میں ایک پریس کانفرنس کے دوران اپنے فیصلے کا باضابطہ اعلان کریں گے۔ اس پریس کانفرنس میں نئی سلیکشن کمیٹی اور قومی جونیئر ٹیم کی انتظامیہ کا اعلان بھی ہو گا۔

ذرائع نے ڈان کو بتایا کہ رانا نئے پی ایچ ایف صدر کے ساتھ کام کرنے میں دلچسپی رکھتے تھے تاہم انہیں معلوم ہوا کہ کھوکھر کی حامی ایک لابی ان سے ناخوش ہے، جس کی وجہ سے ان کیلئے کام جاری رکھنا مشکل ہو گا۔

بطور پی ایچ ایف سیکریٹری رانا کو اپنے 21 مہینوں پر مشتمل دور میں شدید تنقید کا سامنا رہا، حالانکہ اس عرصے میں فنڈز کی شدید قلت کے باوجود قومی ٹیم کی پرفارمنس میں بتدریج بہتری آ رہی تھی۔

رانا اور حال ہی میں سبکدوش ہونے والے پی ایچ ایف صدر اختررسول کے دور میں قومی ٹیم نے 2014 میں تین انٹرنیشنل ایونٹس کے فائنل کھیلے۔

اس کے علاوہ پاکستان نے ایک ہی سال میں ایشین چیمپئنز ٹرافی میں سونے جبکہ ایشین گیمز میں چاندی کا تمغہ اپنے نام کیا۔

تاہم، ان کامیابیوں کے باوجود پی ایچ ایف بیلجئم میں کھیلے گئے اولمپک کوائلی فائرز میں اچھی ٹیم میدان میں نہ اتار سکی، جس کی وجہ وفاقی حکومت کا فیڈریشن کی جانب لاپرواہی پر مبنی رویہ رہا۔

وفاقی حکومت نے جہاں ضروری فنڈز فراہم نہ کیے وہیں اس نے مسلسل تین ایونٹس کے فائنل کھیلنے والے سکواڈ کو بھی عزت نہ دی۔

ٹیم کی اولمپک سے بے دخلی سے ان حلقوں کی راہ ہموار ہوئی جو اُس وقت کے صدر اختر رسول اور دوسرے اعلی عہدے داروں کو گھر جاتےدیکھنے کے خواہش مند تھے۔

پی ایچ ایف میں استعفوں کا آغاز چیف سلیکٹر اصلاح الدین صدیقی سے شروع ہوا ، جس کے بعد صدر اختر رسول نے بھی عہدہ چھوڑنے کا اعلان کیا۔

بعد ازاں، 27 اگست کو اسلام آباد میں منعقد ہونے والے پہلے جنرل باڈی اجلاس میں کھوکھر کو اعتماد کا ووٹ ملا۔ اسی اجلاس میں اختر رسول کے دور کے ہیڈ کوچ شہناز شیخ نے استعفی دیا، جسے منظور کر لیا گیا۔

اجلاس میں اعتماد کا ووٹ حاصل کرنے والے رانا نے اب مستعفی ہونے کا فیصلہ کیا ہے۔

ذرائع بتاتے ہیں کہ کھوکھر اور وزیر اعظم سیکریٹریٹ اس عہدے پر من پسند شخصیت کی تعیناتی کے خواہش مند ہیں۔

ذرائع کے مطابق، سیکریٹریٹ اس عہدے کیلئے پاکستان فوج کے کسی افسر جبکہ کھوکھر شہباز سینئر کو منتخب کرنے کے حامی ہیں۔