اسلام آباد:پاکستان ہاکی کے کوچ شہناز شیخ نے ٹیم کے ریو اولمپک میں کوالی فائی نہ کر نے کا الزام حکومت پر عائد کرتے ہوئے کہا ہے کہ فنڈز کی کمی نے ٹیم کی تیاریوں کو بری طرح متاثر کیا۔

پاکستان نے ریو اولمپک کیلئے کوالی فائنگ راؤنڈ سمجھے جانے والے ’ورلڈ ہاکی لیگ سیمی فائنلز ‘میں انتہائی خراب پرفارمنس دکھاتے ہوئے آٹھویں پوزیشن حاصل کی۔

پاکستان کی 67 سالہ تاریخ میں پہلی مرتبہ ایسا ہو رہا ہے جب گرین شرٹس کسی اولمپک مقابلے کا حصہ نہیں ہو ں گی۔

وزیر اعظم نواز شریف نے ناکامی کی وجوہات جاننے کیلئے ایک تحقیقاتی کمیٹی تشکیل دے دی ہے۔

ٹیم کی اسلام آباد واپسی پر شہناز نے صحافیوں سے گفتگو میں کہا کہ حکومت نے ٹیم کو مناسب فنڈز نہیں دیے۔

’بطور ہیڈ کوچ میں ذمہ داری قبول کرتا ہوں لیکن میں فیڈریشن، وزارت اور حکومت سے فنڈز کا مطالبہ کرتا آیا ہوں۔فنڈز کی قلت کی وجہ سے ہم مناسب ٹریننگ نہیں کر سکے‘۔

’ہم ہاکی کا ڈھانچہ بنانے کیلئے فنڈز لگانا ہوں گے اور کھلاڑیوں کی مالی معاونت کرنا ہو گی، جن کے پاس معاہدے تک نہیں‘۔

انہوں نے بتایا کہ بیلجیم میں کھلاڑیوں کو صرف 20 ڈالرز یومیہ الاؤنس مل رہا تھا۔

یاد رہے کہ پاکستان 2014 ورلڈ کپ میں بھی کوالی فائی نہیں کر سکا تھا اور 2012 لندن اولمپک میں اس کی ساتویں پوزیشن رہی تھی۔ اے ایف پی