جہاد کے اسلامی نظریے میں اپنے ہی ملک کے خلاف دہشت کی کوئی گنجائش نہیں۔ اسی طرح کوئی گروہ اپنے ملک کے خلاف ہتھیار اٹھائے تو اسے آزادی کی جنگ نہیں کہا جا سکتا۔ یہ کھلی بغاوت ہے۔ اس لئے بہتری اسی میں ہے کہ ملک اور قوم کے خلاف لڑنے والے ہتھیار ڈال کر امن و سلامتی کے دائرے میں داخل ہوجائیں۔ اس کے سوا ان کے پاس اور کوئی راستہ بھی نہیں۔ پاکستانی قوم کو آزادی کے بعد اب اندرونی دشمنوں ، دہشتگردوں کی جارحیت کے منڈلاتے ہوئے خطرات کا سامنا ہے دہشتگردی سے فیصلہ کن جنگ کے مرحلہ جو درپیش ہے اس میں وہ اب تک 55ہزار سے زائد قیمتی جانوں کا نذرانہ پیش کرچکی ہے۔ ایک کھرب ڈالر سے زیادہ قومی اثاثوں کے نقصانات اس کے علاوہ ہیں۔ یہ اندرونی دہشت گرد اسلام کی من گھڑت توجیہات کی آڑ میں خودکش دھماکوں اور بم حملوں میں بے گناہ ہم وطنوں کا خون بہا رہے ہیں۔ ان کا ہدف حکومت بھی ہیں اور عام شہری بھی۔ جوان بھی اور بوڑھے بھی، عورتیں اور بچے بھی، وہ دہشت گردی اور تخریب کاری کی ان مذموم کارروائیوں کو جہاد اور آزادی کی جنگ کا نام دیتے ہیں جن کا اسلام کے ابدی اور الوہی اصولوں اور نظریات سے دور کا تعلق بھی نہیں۔