اسلام آباد: عمران خان نے خیبر پختونخوا میں حزبِ اختلاف کی جماعتوں کی جانب سے وزیراعلیٰ پرویز خٹک کے استعفے کے مطالبے کو مسترد کردیا ہے۔

کل سپریم کورٹ کے باہر صحافیوں سے بات کرتے ہوئےانہوں نے اس عزم کا اظہار کیا کہ وہ اپنی پارٹی کی حکومت کا دفاع کریں گے۔

واضح رہے کہ خیبر پختونخوا میں حزبِ اختلاف کی جماعتوں نے صوبے میں حال ہی میں منعقد ہوئے بلدیاتی انتخابات میں دھاندلی کا الزام عائد کرتے ہوئے حکمران جماعت پاکستان تحریک انصاف (پی ٹی آئی) پر دباؤ میں اضافہ کردیا ہے۔

پی ٹی آئی کے سربراہ نے اپنی اس پیشکش کا بھی اعادہ کیا کہ اگر حزبِ اختلاف کی جماعتیں چاہیں تو صوبے میں دوبارہ انتخابات بھی کراوئے جاسکتے ہیں۔

عوامی نیشنل پارٹی (اے این پی) اور جمعیت علمائے اسلام فضل کا کہنا ہے کہ آزادانہ و منصفانہ انتخابات اس وقت ممکن نہیں ہوسکتے جب تک کہ پی ٹی آئی کے وزیراعلیٰ استعفےٰ نہیں دے دیتے۔

میڈیا کے نمائندوں سے بات کرتے ہوئے عمران خان نے کہا کہ ’’آزادانہ و منصافانہ انتخابات الیکشن کمیشن کی ذمہ داری ہے، لیکن پی ٹی آئی کی حکمران جماعت ان کے تحفظات پر بات چیت کرنے کے لیے تیار ہے، جہاں تک صوبائی حکومت کرسکتی ہے۔‘‘

انہوں نے کہا کہ میں حیران ہوں کہ وہ صوبائی حکومت کے استعفے کا مطالبہ کررہے ہیں۔ وزیراعلیٰ پرویز خٹک کیوں استعفیٰ دیں؟

جے یو آئی ایف اور اے این پی کو تنقید کا نشانہ بناتے ہوئے عمران خان نے کہا کہ وزیراعلیٰ کی جانب سے طلب کی گئی آل پارٹی کانفرنس میں دو پارٹیوں کی شرکت سے انکار سے یہ ظاہر ہوتا ہے کہ وہ ’دوہرے معیار‘ رکھتے ہیں۔