پی کے 95 میں دوبارہ انتخابات کا حکم
اسلام آباد: الیکشن کمیشن آف پاکستان نے خیبرپختونخوا اسمبلی کے حلقے پی کے 95 لوئر دیر میں خواتین کے ووٹ کاسٹ نہ ہونے کے باعث نتائج کو کالعدم قرار دے کر دوبارہ الیکشن کرانے کا حکم دے دیا ہے۔
گزشتہ ماہ 7 مئی کو صوبائی اسمبلی کے حلقے پی کے 95 لوئر دیر پر ضمنی انتخابات میں جماعت اسلامی اور عوامی نیشنل پارٹی (اے این پی) کے امیدواروں کے درمیان مقابلہ ہوا۔
مذکورہ حلقے سے جماعت اسلامی کے امیدوار اعزاز الملک کو کامیابی حاصل ہوئی جبکہ عوامی نیشنل پارٹی کے امیدوار حاجی سردار بہادر دوسرے نمبر پر رہے۔
نمائندہ ڈان نیوز کے مطابق پی کے 95 میں خواتین کے ووٹ نہ ڈالنے کے معاملے پر الیکشن کمیشن نے نوٹس لیا تھا۔ حلقے میں 53 ہزار خواتین ووٹرز رجسٹرڈ ہیں جنہوں نے اپنا حق رائے استعمال نہیں کیا تھا۔
مزید پڑھیں: پی کے 95 ضمنی انتخاب: جماعت اسلامی کامیاب
پی کے 95 میں ایک لاکھ 27 ہزار 96 ووٹرز رجسٹرڈ ہیں جن میں 53 ہزار خواتین شامل ہیں تاہم خواتین کا ٹرن آؤٹ کم رہا۔
اس سے قبل یہ رپورٹس بھی سامنے آئی تھیں کہ قبائلی جرگے نے خزانہ پولنگ اسٹیشن پر خواتین کو ووٹنگ سے روک دیا جہاں 1000 خواتین رجسٹرڈ تھیں۔
مذکورہ نشست جماعت اسلامی کے امیر سراج الحق کے سینیٹر منتخب ہونے کے بعد خالی ہوئی تھی۔
لائیو ٹی وی