اسلام آباد: کل مرکزی ترقیاتی ورکنگ پارٹی (سی ڈی ڈبلیو پی) نے 165.20 ارب روپے کی لاگت کے لاہور اورنج لائن میٹرو ٹرین منصوبے کی منظوری دیتے ہوئے حتمی منظوری کے لیے ایکنک کے حوالے کردیا۔

اس منصوبے کے تحت لاہور میں ٹرین ماس ٹرانزٹ سسٹم کے لیے 27.1 کلومیٹر طویل سگنل فری کوریڈور تعمیر کی جائے گی۔

ترقی و منصوبہ بندی کے وزیر احسن اقبال نے سی ڈی ڈبلیو پی کے اجلاس کی صدارت کی، انہوں نے لاہور ڈیویلپمنٹ اٹھارٹی (ایل ڈی اے) کو اس میگا پروجیکٹ کی 27 مہینوں میں تکمیل کی ہدایت کی۔

اس کوریڈور پر دو ٹرینوں کے راستے تعمیر کیے جائیں گے، اور یہ سسٹم 30 ہزار افراد فی گھنٹے کی استعداد کا حامل ہوگا۔

اورنج لائن میٹرو ٹرین کے لیے چین کی حکومت رعایتی قرضے کے ساتھ پنجاب کے اپنے وسائل سے سرمایہ فراہم کیا جارہا ہے۔

اس منصوبے کے مجوزہ کوریڈور کا آغاز علی ٹاؤن سے ہوگا، جو نیاز بیگ، بند روڈ، چو برجی، انارکلی، لکشمی، ریلوے اسٹیشن، انجینئرنگ یونیورسٹی، شالامار گارڈن، اسلام پارک سے ہوتا ہوا ڈیرہ گجران پر ختم ہوگا۔