حال ہی میں اپنا ہم ٹی وی ایوارڈ سانحہ پشاور کے متاثرہ خاندانوں کے نام کرنے پر شہرت پانے والے پاکستانی گلوکار فرحان سعید نے اب اپنے نئے گانے کے ذریعے شمالی علاقوں میں جاری آپریشن ضرب عضب میں شریک فوجیوں کو خراج تحسین پیش کیا ہے۔

دلوں کو چھولینے والا گانا 'تو تھوڑی دیر اور ٹھہر جا' فرحان سعید اور آئی ایس پی آر کی مشترکہ کاوش ہے۔

اس گانے کے بول اور ویڈیو ایک فوجی کی کہانی بیان کرتے ہیں جو اپنے گھر سے دور وطن عزیز کے لیے لڑ رہا ہے۔ اس گانے میں فرحان سعید کے ساتھ ساتھ عروہ حسین بھی شامل ہیں جو فرحان سعید کی بیوی کا کردار ادا کر رہی ہیں۔

اس گانے میں مزید دکھایا گیا کہ فرحان سعید اپنی شادی کی رات اپنی بیوی کو ڈیوٹی کی وجہ سے اکیلا چھوڑ کر چلے جاتے ہیں۔

یہ پہلی بار نہیں ہے کہ پاک فوج کے جوانوں کو کسی گانے کی شکل میں خراج تحسین پیش کیا جا رہا ہو۔ اس سے قبل جل بینڈ نے بھی پشاور سانحہ کے فوجیوں کے اعزاز میں 'تو قدم بڑھائے جا' گانا پیش کیا تھا۔

ایک شو میں انٹرویو کے دوران فرحان سعید نے بتایا تھا کہ اس گانے کا عنوان ان کو اس فوجی کی یاد دلاتا ہے جو سب کو پیچھے چھوڑ کر ملک کی خاطر اپنی ڈیوٹی کرنے گھروں سے دور رہتے ہیں اور یہ گانا ہر اس فوجی کے لیے خراج تحسین ہے جو آپریشن ضرب عضب میں لڑ رہا ہے۔