پھانسی کے 6 مجرموں کی اپیلیں مسترد
کراچی: پاکستان کے صدر ممنون حسین نے سندھ کی مختلف جیلوں میں قید پھانسی کے 6 مجرموں کی رحم کی اپیل مسترد کردی ہیں۔
پشاور کے آرمی پبلک اسکول پر دسمبر میں دہشت گردوں کے حملے اور طالب علموں سمیت 140 سے زائد افراد کی ہلاکت کے بعد سے پھانسی پر سے پابندی ہٹا دی گئی تھی اور اب تک 20 سے زائد مجرموں کو پھانسی دی جا چکی ہے۔
ڈان نیوز کے مطابق صدر مملکت کی جانب سے جن مجرموں کی رحم کی اپیلیں مسترد کی گئی ہیں ان میں منورعلی، محمد فیصل، محمد فضل، آچر عرف بھائی خان، عبدالعزیز اور بشیراحمد نامی قیدی شامل ہیں جن کا تعلق کالعدم تنظیموں سے ہے۔
ذرائع کا کہنا ہے کہ ان مجرموں کو سندھ کی مختلف انسداد دہشت گردی کی عدالتوں نے پھانسی کی سزائیں سنائی تھیں۔
ذرائع کے مطابق وفاقی وزارت داخلہ نے کی جانب سے محکمہ داخلہ سندھ کو اس حوالے سے آگاہ کر دیا گیا ہے جس کے بعد محکمہ داخلہ سندھ نے محکمہ جیل خانہ جات کو ان مجرموں کے ڈیتھ وارنٹ حاصل کرنے کیلئے مراسلہ لکھ دیا ہے۔
لائیو ٹی وی