شاہد آفریدی کو بدنام کیا گیا، سرفراز نواز
لاہور: سابق پاکستانی فاسٹ باؤلر سرفراز نواز نے قومی کھلاڑیوں پر جرمانہ عائد کیے جانے پر برہمی کا اظہار کرتے ہوئے کہا ہے کہ جرمانہ عائد کر کے شاہد آفریدی سمیت آٹھوں کھلاڑیوں کو اخبار میں بدنام کیا گیا جس سے ہندوستان کے خلاف میچ میں ان کی کارکردگی متاثر ہوئی۔
سابق فاسٹ باؤلر نے نجی ٹی وی کے پروگرام میں گفتگو کرتے ہوئے کہا کہ جرمانہ عائد کیے جانے سے کھلاڑی اپ سیٹ تھے جس کے باعث وہ ہندوستان کے خلاف 100 فیصد کارکردگی نہ دکھا سکے۔
یاد رہے کہ پاکستان کی ٹیم مینجمنٹ نے ٹیم کرفیو توڑنے پر اسٹار آل راؤنڈر شاہد آفریدی سمیت ٹیم کے آٹھ کھلاڑیوں پر فی کس 300 آسٹریلین ڈالر جرمانہ کیا تھا۔
اس پر شاہد آفریدی نے اپنے بیان میں کہا تھا کہ ساتھی کھلاڑیوں کے ساتھ رات کا کھانا کھانے گئے تھے ناکہ ڈانس کرنے۔
سرفراز نے کہا کہ شاہد آفریدی قوم کے ہیرو ہیں، انہیں جرمانہ لگا کر اخبارات میں بدنام کیا گیا۔
ان کا کہنا تھا کہ بات 300 ڈالرز کی نہیں بلکہ عزت کی ہے اور اسی وجہ سے احمد شہزاد اور شاہد آفریدی جیسے کھلاڑی اپنی بدنامی پر ناخوش نظر آئے۔
سابق ٹیسٹ کرکٹر نے مزید کہا کہ یونس کو ہندوستان کے خلاف میچ میں شرکت نہیں کرنی چاہیے تھی کیونکہ ایک تو وہ فارم میں نہیں اور دوسرا انہیں ان کے نمبر پر نہیں کھلایا گیا۔
اس موقع پر اسپنر سعید اجمل نے کہا کہ زمبابوے اور آئرلینڈ نے اپنے میچوں میں اچھی کارکردگی کا مظاہرہ کیا لہذاٰ پاکستان کے پاس سستی دکھانے کا کوئی چانس نہیں۔
اجمل نے قوم ٹیم کو مشورہ دیا کہ وہ ہر میچ کو آخری میچ سمجھ کر کھیلے اور کسی بھی موقع پر سستی کا مظاہرہ نہ کرے۔
لائیو ٹی وی
تبصرے (1) بند ہیں