چمن میں دھماکا، چار افراد زخمی
چمن: پاک افغان سرحد کے قریب واقع شہر چمن کے علاقے مال روڈ پر آج پیر کی صبح ایک دھماکے کے نتیجے میں چار افراد زخمی ہوگئے ہیں۔
ایک پولیس اہلکار نعمت اللہ نے ڈان ڈاٹ کام کو بتایا کہ شدت پسندوں نے دھماکا خیز مواد ایک موٹر سائیکل میں نصب کررکھا تھا، جسے سڑک کنارے پارک کیا گیا تھا۔ انہوں نے بتایا کہ دھماکا اس وقت ہوا جب سیکیورٹی فورسز کی گاڑی وہاں سے گزر رہی تھی۔
تاہم، دھماکے میں سیکیورٹی اہلکار محفوظ رہے۔
ان کا کہنا تھا کہ دھماکے میں چار راہگیر زخمی ہوئے جن کو بعد میں سول ہسپتال چمن منتقل کردیا گیا۔
ہسپتال انتظامیہ کا کہنا ہے زخمیوں میں سے ایک کی حالت تشویشناک ہے۔
ابتدائی طور پر کسی نے بھی اس واقعہ کی ذمہ داری قبول نہیں کی ہے۔
خیال رہے کہ ایک ہفتے پہلے بھی چمن میں اسی طرح ایک دھماکا ہوا تھا، جس میں ایک شخص ہلاک اور دیگر دس زخمی ہوگئے تھے۔
لائیو ٹی وی