اسلام آباد: پاکستان تحریک انصاف کے چیئرمین عمران خان نے خبردار کیا ہے کہ اگر احتجاج روکنے کے لیے کھڑی کی جانے والی رکاوٹوں کی وجہ سے انتشار پھیلا تو ذمہ دار حکومت ہوگی جبکہ کارکنوں کو راستہ نہ دیا گیا تو جمہوریت ڈی ریل ہوگی۔

اسلام آباد میں پریس کانفرنس سے خطاب کرتے ہوئے عمران خان کا کہنا تھا کہ ان کا احتجاج انتخابات کے دوران 'ریکارڈ' دھاندلی کے خلاف ہے اور انہیں قانونی طریقے سے انصاف نہیں ملا۔

پی ٹی آئی کو ریلی کے انعقاد کی اجازت

انہوں نے کہا کہ تمام جماعتوں نے انتخابات میں دھاندلی کے الزامات عائد کیے اور پی ٹی آئی نے اب اس کے خلاف کھڑے ہونے کا فیصلہ کیا ہے۔ انہوں نے کہا کہا کہ تمام پاکستانی کل (گیارہ مئی) نیا پاکستان بنانے ڈی چوک پہنچیں گے۔

چیئرمین پی ٹی آئی کا کہنا تھا کہ وہ مڈٹرم انتخابات کا مطالبہ نہیں کررہے اور صرف دھاندلی کے خلاف احتجاج کررہے ہیں۔

احتجاج سے روکا گیا تو حکومت خطرے میں ہوگی، عمران خان

انہوں نے الزام عائد کیا کہ پولیس ان کی جماعت کے کارکنوں کو تنگ کررہی ہے اور ان کے پرامن احتجاج کو روکنے کی کوششیں جاری ہیں تاہم سسٹم ٹھیک ہونے تک تحریک نہیں رکے گی۔

ان کا مزید کہنا تھا کہ ان کی کسی سے لڑائی نہیں ہے اور وہ دھاندلی میں ملوث عناصر کو سزا دلوانا چاہتے ہیں۔