پی ٹی آئی وسط مدتی انتخابات کے حق میں نہیں ،ہاشمی
اسلام آباد: پاکستان تحریک انصاف کے رہنما مخدوم جاوید ہاشمی نے بدھ کو قومی اسمبلی کو یقین دہانی کرائی کہ پی ٹی آئی وسط مدتی انتخابات کے حق میں نہیں ہے۔
ملک میں امن و امان کی صورتحال پر تبصرہ کرتے ہوئے تحریک انصاف کے رہنما کا کہنا تھا کہ 2013 ء کے عام انتخابات میں دھاندلی کے خلاف گیارہ مئی کو احتجاج کرنا تحریک انصاف کا آئینی حق ہے۔
جاوید ہاشمی نے کہا کہ تمام سیاسی جماعتوں کو ہر قیمت پر جموریت اور پارلیمنٹ کی حفاظت کے لئے اپنا کردار ادا کرنا چاہیئے۔
انہوں نے کہا کہ پارلیمنٹ ہماری ماں ہے، ہم پارلیمنٹ کی بالادستی پر کوئی سمجھوتہ نہیں کریں گے، تمام اداروں کو ملک کی ترقی کے لئے اپنے مینڈیٹ کے تحت کام کرنا چاہیئے۔
ان کا کہنا تھا کہ اظہار رائے کی آزادی پر پابندی کسی بھی مسئلہ کا حل نہیں ہے۔ 'اس سلسلے میں ذرائع ابلاغ ہاؤسز کے لئے ضابطہ اخلاق ہونا چاہیئے۔'
اس موقع پر مسلم لیگ (ن) کے ایم این اے رانا تنویر حسین نے کہا کہ میڈیا کے نمائندوں کو قومی مفاد کے حوالے سے محتاط ہونا چاہیئے۔
انہوں نے کہا کہ تحریک انصاف کو آئندہ عام انتخابات کا انتظار کرنا چاہیئے کیونکہ انتخابات میں دھاندلی کے خلاف احتجاج مسئلہ کا حل نہیں ہے۔
اس سے پہلے ایم کیو ایم کے ارکان پارلیمنٹ نےکراچی میں ایم کیو ایم کے کارکنوں کی ٹارگٹ کلنگ کے واقعات کے خلاف قومی اسمبلی کی کارروائی سے واک آؤٹ کیا۔
لائیو ٹی وی