کابل: افغانستان کے شمال میں ایک مارکیٹ میں واقع چیک پوسٹ کے باہر ایک خودکش بم حملے کے نتیجے میں کم سے کم 15 افراد ہلاک ہوگئے ہیں۔

حکام کا کہنا ہے کہ حملہ آور رکشہ چلا رہا تھا، اس نے خود کو چیک پوسٹ کے باہر دھماکے سے اڑا لیا۔

شمالی صوبہ فریاب میں ہوئے اس حملے کی کی ذمہ داری اب تک کسی گروپ یا تنظیم نے قبول نہیں کی ہے، لیکن جس علاقے میں یہ واقعہ ہوا ہے، وہاں پر افغان طالبان خاصے سرگرم ہیں۔

خیال رہے کہ طالبان اگلے مہینے 5 اپریل کو ہونے والے صدراتی انتخابات کے سلسلے میں کی جانی والی مہم کے دوران پرتشدد واقعات کی دھمکی دے چکے ہیں۔

یہ واقعات ایسے حالات میں رونما ہورہے ہیں جبکہ اس سال کے آخر میں ملک سے غیر ملکی افواج انخلا کی تیاری میں مصروف ہیں اور انتخابات کے بعد ایک نئے صدر کا انتخاب کیا جانا ہے۔

حکام کا کہنا ہے کہ آج ہونے والا یہ خودکش حملہ مارکیٹ کے داخلی راستے پر واقع چیک پوسٹ پر کیا گیا۔

صوبائی گورنر محمد پشتاش نے ہلاکتوں کی تصدیق کرتے ہوئے کہا کہ اس واقعہ میں 23 افراد زخمی بھی ہوئے ہیں۔

طالبان متعدد بار فریاب کو نشانہ بناچکے ہیں۔

اس علاقے میں اکتوبر 2012ء میں ایک مسجد کے باہر ہوئے خودکش حملے میں 41 افراد ہلاک ہوگئے تھے۔

واضح رہے کہ طالبان باغیوں کی افغان فورسز اور غیر ملکی افواج کےساتھ لڑائیوں میں اکثر اوقات عام شہری نشانہ بنتے رہے ہیں۔

حال ہی میں اقوامِ متحدہ کی ایک رپورٹ میں کہا گیا تھا کہ گزشتہ سال افغانستان میں دو ہزار نو سو انسٹھ شہری ہلاک اور پانچ ہزار چھ سو چھپن زخمی ہوئے۔ یہ تعداد اس سے پچھلے سال کے مقابلے میں 14 فیصد زیادہ ہے۔

تاہم طالبان اس بات انکار کرتے ہیں کہ ان کی کارروائیوں میں عام شہریوں کو نشانہ بنایا جاتا ہے۔