اسلام آباد: وزارت داخلہ نے خبردار کیا ہے کہ طالبان اور القاعدہ سابق فوجی صدر جنرل (ر) پرویز مشرف پر قاتلانہ حملے کی منصوبہ بندی کر رہے ہیں۔

پیر کو وزارت داخلہ کی جانب سے ہوم سکریٹری پنجاب، اسلام آباد کے پولیس سربراہ، چیف کمشنر اور دوسرے متعلقہ حکام کو جاری ایک خط میں کہا گیا ہے کہ کالعدم پاکستان تحریک طالبان اور القاعدہ کے دہشت گرد مستقبل قریب میں مشرف کو نشانہ بنا سکتے ہیں۔

ڈان نیوز کو ملنے والے اس خط کی ایک کاپی کے مطابق، وزارت داخلہ نے خبردار کیا ہے کہ مشرف کو عدالت کے اندر یا باہر ہدف بنایا جا سکتا ہے۔

ایسے میں وزارت نے کسی بھی ناخوشگوار واقعہ سے بچنے کے لیے سخت اور فول پروف سیکورٹی کا مشورہ بھی دیا۔

پیر کو میڈیا رپورٹس میں مشرف کے وکیل احمد رضا قصوری کے حوالے سے بتایا گیا تھا کہ اگر سخت سیکورٹی فراہم نہ کی گئی تو ان کے موکل منگل کو خصوصی عدالت کے سامنے پیش نہیں ہو گے۔

مشرف کے وکلا ماضی میں بھی عدالت کو خبردار کر چکے ہیں کہ دہشت گرد ججوں اور ان کو قتل کرنے کی منصوبہ بندی کر رہے ہیں۔

مشرف کے وکیل رانا اعجاز نے گزشتہ ہفتے عدالت کے سامنے کہا تھا کہ انہیں اطلاع ملی ہے کہ دہشت گرد خصوصی عدالت کے ججوں، دو وکیل صفائی اور ایک پراسیکیوٹر کو قتل کرنے کی منصوبہ بندی کر رہے ہیں۔