ججز نظر بندی کیس: مشرف کی پیشی سے استثنی ٰ کی درخواست منظور
اسلام آباد: اسلام آباد کی انسدادِ دہشت گردی کی خصوصی عدالت نے ججز نظر بندی کیس میں سابق صدر پرویز مشرف کی آج کی پیشی سے استثنیٰ کی درخواست منظور کرتے ہوئے کیس کی سماعت کو سات مارچ تک ملتوی کردیا۔
انسداد دہشت گردی کی خصوصی عدالت کے جج عتیق الرحمان نے آج پیر کے روز پرویز مشرف کے خلاف ججز نظربندی کیس کی سماعت کی۔
اس موقع پر سابق صدر کے وکیل الیاس صدیقی ایڈووکیٹ نے اپنے مؤکل کی حاضری سے استثنیٰ کی درخواست پیش کی، جسے عدالت نے منظور کرلیا۔
الیاس صدیقی نے عدالت کو بتایا کہ اے ایف آئی سی حکام ہمیں مشرف کی میڈیکل رپورٹ فراہم نہیں کر رہے ہیں، لٰہذا عدالت اپنے طور پر یہ رپورٹ حاصل کرے۔
پبلک پروسکیوٹر ندیم تابش نے بتایا کہ نہ مشرف پیش ہو رہے ہیں نہ ان کے ضامن اور عدالت کو چاہئیے کہ وہ اگلی تاریخ پر میرٹ پر فیصلہ دے۔
یاد رہے کہ سابق صدر پرویز مشرف کی جانب سے تین نومبر 2007ء کو اعلیٰ عدلیہ کے 60 ججوں کو نظر بند کرنے پر یہ مقدمہ اگست 2009ء میں ایک مقامی وکیل کی شکایت پر درج کیا گیا تھا۔
لائیو ٹی وی