لاہور: پالیمانی کمیٹی نے منگل کے روز متفقہ طور پر پنجاب کے نگران وزیراعلی کے لئے سینئر صحافی نجم سیٹھی کے نام پر اتفاق کرلیا ہے۔

ڈان نیوز کے مطابق پالیمانی کمیٹی کے سربراہ رانا ثناء اللہ نے پریس کانفرنس میں پنجاب کے نگران وزیر اعلٰی کیلئے سینئر صحافی نجم سیٹھی کے نام کا اعلان کیا۔

پنجاب میں نگراں وزیراعلیٰ کے لیے ن لیگ اور اپوزیشن کی چھ رکنی پارلیمانی کمیٹی نے جن چار ناموں پر غورکیا ان میں ن لیگ کے نامزد کردہ جسٹس ریٹائرڈ عامر رضا خان، سابق بیورو کریٹ خواجہ ظہیر جبکہ حزب اختلاف کے تجویز کردہ جسٹس ریٹائرڈ زاہد حسین اور سینئر صحافی نجم سیٹھی کے نام شامل تھے۔

پنجاب کے نگراں وزیر اعلی کے لیے نامزد نجم سیٹھی صحافی اور تجزیہ نگار کی حیثیت سے معروف ہیں اور صحافت کے میدان کا طویل عملی تجربہ رکھتے ہیں۔

سیٹھی کا تعلق پنجاب کے دارالحکومت لاہور سے ہے انہوں نے گورنمنٹ کالج لاہور سے گریجویشن کیا بعد میں اکنامکس میں کیمبرج یونیورسٹی انگلینڈ سے ماسٹرز کیا۔

 انہوں نے کئی اہم ملکی اخبارات اور رسائل کے ادارتی شعبے میں خدمات انجام دیں۔

 سینئر صحافی نجم سیٹھی کو انیس سو ننانوے میں غیرملکی ٹی وی شو میں متنازعہ انٹرویو دینے کے الزام میں گرفتار کرلیا گیا تھا۔ وہ ان دنوں مقامی نجی ٹی وی میں سیاست اور حالات حاضرہ سے متعلق ایک پروگرام بھی کرتے ہیں۔

 ڈان نیوز کے پروگرام "فیصلہ عوام کا' میں گفتگو کرتے ہوئے نامزد وزیراعلیٰ پنجاب نجم سیٹھی کا کہنا تھا کہ ملک میں پہلی دفعہ صاف اور شفاف انتخابات ہو رہے ہیں اور وہ اپنی کابینہ بھی چھوٹی رکھیں گے۔

 نجم سیٹھی نے کہا کہ الیکشن کمیشن اور عدالتی احکامات پر عملدرآمد کرایا جائے گا اور اگر ایسا نہ ہوا تو وہ گھر چلے جانا پسند کرینگے۔