پشاور: جماعت اسلامی کے سابق امیر قاضی حسین احمد کے قافلے پر مبینہ خود کش حملے میں تنظیم کے چار کارکن زخمی ہوئے ہیں۔

حملہ پیر کی صبح اس وقت کیا گیا جب قاضی حسین احمد حلیب زئی کے علاقے میاں منڈی میں ایک جلسے سے خطاب کرنے جارہے تھے ۔

حملے میں سابق امیر محفوظ رہے تاہم قافلے میں شامل ایک گاڑی کو نقصان پہنچا۔

ڈان نیوز نے سرکاری حکام کے حوالے سے اسے خود کش حملہ قرار دیا ہے۔

دھماکے کے بعد سیکورٹی حکام نے سرچ آپریشن شروع کردیا جبکہ زخمیوں کو غلانئی ہسپتال منتقل کیا گیا ہے۔

دوسری جانب خیبر پختونخواہ کے وزیر اطلاعات میاں افتخار نے قاضی حسین احمد پر حملے کی مذمت کرتے ہوئے انکشاف کیا ہے کہ انتخابات کے دوران بھی دہشت گردی کا خطرہ ہے اور اگر انتخابات نہ کرائے گئے تو حالات مزید خراب ہوں گے۔