تاخیر سے آنے پر ٹی وی میزبان پر حرا سومرو کا غصہ ڈراما نکلا
اداکارہ حرا سومرو کی جانب سے تاخیر سے آنے پر ٹی وی شو کے میزبان پر غصہ کرنے کی ویڈیو ڈراما نکلی۔
حرا سومرو چند دن قبل پاکستان ٹیلی وژن (پی ٹی وی) کے پروگرام ’رائزنگ اسٹار‘ میں شریک ہوئی تھیں، جہاں انہوں نے مختلف معاملات پر کھل کر بات کی تھی۔
پروگرام کے دوران ایک وقت پر حرا سومرو نے ٹی وی میزبان محمد شعیب پر اظہار برہمی کیا کہ وہ شو کے سیٹ پر تاخیر سے پہنچے۔
حرا سومرو کی جانب سے ٹی وی میزبان پر غصہ کرنے کی ویڈیو کو پی ٹی وی کے سوشل میڈیا اکاؤنٹس پر بھی شیئر کیا گیا تھا جو کہ وائرل ہوگئی تھی۔
ویڈیو میں حرا سومرو کو ٹی وی میزبان پر برہم ہوتے دیکھا گیا تھا، جس میں وہ ٹی وی میزبان کو وقت کی اہمیت سمجھنے کا درس دیتی دکھائی دی تھیں۔
ویڈیو وائرل ہونے کے بعد اگرچہ بعض صارفین نے نشاندہی کی تھی کہ ممکنہ طور پر ویڈیو کو منصوبے کے تحت بنایا اور وائرل کیا گیا، تاہم پی ٹی وی انتظامیہ اور اداکارہ نے کچھ وقت تک خاموشی اختیار کیے رکھی تھی۔
اب پی ٹی وی کے سوشل میڈیا اکاؤنٹس پر ایک اور ویڈیو شیئر کرکے بتایا گیا کہ حرا سومرو کا غصہ ڈراما تھا۔
اداکارہ نے بھی انسٹاگرام اسٹوری میں بتایا کہ انہیں ٹی وی میزبانوں نے غصہ کرنے کی اداکاری کرنے کا کہا تھا۔
جاری کردہ ویڈیو میں دیکھا جا سکتا ہے کہ ٹی وی میزبان حرا سومرو کو بتاتے ہیں کہ وہ ایک ٹی وی میزبان پر تاخیر سے آنے کا الزام لگا کر سنجیدگی سے اداکاری کریں۔
ٹی وی میزبان کی ہدایات کے مطابق حرا سومرو نے تاخیر سے آنے کا الزام لگا کر ٹی وی میزبان محمد شعیب پر غصہ نکالنے کی اداکاری کی، جسے بعض لوگوں نے سچ سمجھا۔