پاکستانی نژاد امریکی اداکار فاران طاہر جو جلد ہی پاکستانی پہلی سائنس فکشن فلم ’عمرو عیار‘ میں دکھائی دیں گے، وہ امریکی ویب سیریز میں بھی سپر ولن کے طور پر دکھائی دیں گے۔

امریکی شوبز ویب سائٹ ’ڈیڈ لائن‘ کے مطابق فاران طاہر کو ڈزنی پلس کی ویب سیریز ’وژن کوئیسٹ‘ (Vision Quest) میں سپر ولن کے کردار کے لیے کاسٹ کرلیا گیا۔

ویب سائٹ کے مطابق مذکورہ ٹی وی سیریز کی شوٹنگ کافی عرصے سے جاری ہے، جس میں مارول سائنس فکشن فلموں کے کئی کردار دکھائی دیں گے۔

مذکورہ ویب سیریز میں فاران طاہر ’ٹین رنگز‘ نامی گینگ کے لیڈر کے کردار میں دکھائی دیں گے اور ان کے کردار کا نام ’رضا‘ ہوگا جو کہ انہوں نے 2008 کی سائنس فکشن فلم ’آئرن مین‘ میں ادا کیا تھا۔

ویب سیریز میں بھی فاران طاہر آئرن مین فلم کے روپ میں سپر ولن کے طور پر دکھائی دیں گے اور وہ سیریز کے سپر ہیرو کو اسکرین پر مزہ چکھاتے دکھائی دیں گے۔

فاران طاہر کے مذکورہ ولن کے کردار کو مارول سیریز کے سپر ولنز میں شمار کیا جاتا ہے اور ان کا کردار طاقتور ترین غنڈے کے کرداروں میں سے ایک ہے، جس کے دنیا بھر میں کروڑوں شائقین موجود ہیں۔

یہ واضح نہیں ہے کہ مذکورہ ویب سیریز کب تک ریلیز کی جائے گی، تاہم ابھی اس کی شوٹنگ جاری ہے، امکان ظاہر کیا جا رہا ہے کہ ویب سیریز کو رواں برس کے اختتام تک پیش کردیا جائے گا۔

فاران طاہر مذکورہ ویب سیریز سے قبل بھی متعدد ہولی وڈ سائنس فکشن فلموں، ویب سیریز اور ایکشن فلموں میں کام کر چکے ہیں، وہ خصوصی طور پر منفی کرداروں میں نظر آتے ہیں۔

علاوہ ازیں فاران طاہر متعدد پاکستانی فلموں اور ڈراموں میں بھی کام کر چکے ہیں اور جلد ہی ان کی پہلی سائنس فکشن فلم ’عمرو عیار‘ بھی ریلیز ہوگی، جس میں ان کےہمراہ عثمان مختار اور ثنا نواز جیسی اداکارائیں کام کرتی دکھائی دیں گی۔

ساتھ ہی فاران طاہر کرکٹر شعیب اختر کی زندگی پر بننے والی فلم ’راولپنڈی ایکسپریس‘ میں بھی دکھائی دیں گے۔