بٹ کوائن کی بڑھتی ہوئی قدر نے اعلیٰ درجے کے فیشن برانڈز اور ریٹیلرز کی توجہ حاصل کی ہے، ان برانڈز نے نئے دولت مندوں تک رسائی اور کرپٹو سرمایہ کاروں کے ساتھ وفاداری کے لیے کرپٹو کرنسی کو لین دین کی ادائیگی کی پیشکش دینے میں دلچسپی لینا شروع کی ہے۔

برطانوی خبر رساں ادارے ’رائٹرز‘ کے مطابق کچھ عرصہ قبل تک صرف چند لگژری برانڈز بشمول ایل وی ایم ایچ واچ لیبلز ہبلوٹ، ٹیگ ہیور، کیرنگ کی ملکیت والے فیشن برانڈز گوچی اور بیلنسیاگا نے کرپٹو ادائیگی کی پیشکشوں کے تجربات کیے تھے۔

حالیہ ہفتوں کے دوران فرانسیسی پرتعیش ڈپارٹمنٹ اسٹور ’پرنٹیمپس‘ نے اعلان کیا ہے کہ وہ دنیا کی سب سے بڑی کرپٹو ایکسچینج، بائنانس اور فرانسیسی فنانشل ٹیک کمپنی لیزی کے ساتھ مل کر فرانس میں اپنے اسٹورز میں بٹ کوائن اور ایتھیریم سمیت کرپٹو کرنسیوں کو قبول کر رہا ہے اور ایسا کرنے والا پہلا یورپی ڈپارٹمنٹ اسٹور بن گیا ہے۔

بٹ کوائن کی قدر میں اضافے کے ساتھ سامنے آنے والے اس اقدام کو دیگر برانڈز اور ریٹیلرز نے بھی دیکھا ہے جو اس میں شامل ہونے میں دلچسپی ظاہر کر رہے ہیں۔

بائنانس فرانس کے صدر ڈیوڈ پرنکے کا کہنا ہے کہ بہت سی کالز موصول ہوئی ہیں جن میں دلچسپی کا اظہار کیا گیا ہے۔

لگژری لائٹر اور قلم بنانے والی کمپنی ایس ٹی ڈوپونٹ نے خبر رساں ادارے ’رائٹرز‘ کو بتایا کہ اس کا مقصد کرسمس کی تعطیلات سے قبل پیرس کے 2 اسٹورز میں کرپٹو کرنسی کی ادائیگیاں قبول کرنا ہے۔

تجربات کے دائرے میں، کروز کمپنی ورجن وائجز نے اس ماہ اپنی پہلی پروڈکٹ پیش کرنا شروع کی، جس میں بٹ کوائن کو ادائیگی کے آپشن کے طور پر قبول کیا گیا تھا، یہ کمپنی اپنے کروز جہازوں پر ایک سال تک سفر کرنے کے لیے ایک لاکھ 20 ہزار ڈالر کا سالانہ پاس آفر کرتی ہے۔

ریگولیٹرز نے خبردار کر رکھا ہے کہ بٹ کوائن جیسی کرپٹو کرنسیاں بڑے خطرے والے اثاثے ہیں، حقیقی دنیا میں محدود استعمال کے ساتھ، اتار چڑھاؤ ادائیگی کے ذریعے کے طور پر وسیع پیمانے پر اپنانے میں ایک اور رکاوٹ رہا ہے، لیکن نومنتخب امریکی صدر ڈونلڈ ٹرمپ کی جانب سے حمایت کے وعدوں نے، جن سے توقع کی جاتی ہے کہ وہ زیادہ دوستانہ ای کرنسی ریگولیشن لائیں گے، بٹ کوائن کی قیمت میں ریکارڈ اضافہ ہوا ہے۔

ایس اینڈ پی تجزیہ کاروں کا کہنا ہے کہ بیانیہ تبدیل ہونا شروع ہو گیا ہے، یہ نوٹ کرتے ہوئے کہ مالیاتی مارکیٹوں میں بلاک چین جدت طرازی کرپٹو کرنسیوں کے لیے پیشگوئی میں اضافہ کر سکتی ہے۔

جدید برانڈنگ کی تلاش

لگژری لیبلز طویل عرصے سے سلیکون ویلی کے بڑے مالز میں اسٹور کھول کر اور ہرمز ایپل واچ جیسی مصنوعات جاری کرکے ٹیکنالوجی انڈسٹری سے تعلق رکھنے والے خوشحال خریداروں کی ضروریات کو پورا کرنے کی کوشش کر رہے ہیں، مثال کے طور پر، یہ فرانسیسی برکن بیگ بنانے والی کمپنی کے چمڑے کی پٹیوں کو ٹیکنالوجی کمپنی ایپل کے منسلک ٹائم پیس کے ساتھ جوڑتا ہے۔

اب بٹ کوائن کی حالیہ بلند ترین سطح ایک لاکھ 7 ہزار ڈالر سے تجاوز کرنے کے بعد پیدا ہونے والی نئی دولت ایک ایسے وقت میں سامنے آئی ہے، جب لگژری انڈسٹری کو برسوں کی سب سے بڑی گراوٹ کا سامنا ہے اور یہ ترقی کے نئے ذرائع تلاش کر رہی ہے۔

ایس اینڈ پی گلوبل ریٹنگز میں ڈیجیٹل اثاثوں کے سربراہ تجزیہ کار اینڈریو اونیل نے کہا کہ کرپٹو کرنسی ادائیگیوں کی پیشکش کمپنیوں کے لیے ایک بھرے ہوئے پرانے برانڈ کے بجائے خود کو جدید برانڈ کے طور پر پیش کرنے کا طریقہ ہوسکتا ہے، جو صرف بومرز کو فروخت کر رہا ہے۔

ادائیگی کا آپشن بڑی حد تک علامتی رہتا ہے، اینڈریو اونیل نے کہا کہ خوردہ فروش عام طور پر اتار چڑھاؤ کے خطرات کو دور کرنے کے لیے فنڈز کو یورو یا ڈالر میں تبدیل کرتے ہیں، جبکہ زیادہ تر خریداروں کے لیے ادائیگی کے طریقوں کو پے پال یا وینمو جیسے پلیٹ فارمز نے پہلے ہی حل کردیا ہے۔

تجزیہ کاروں کا کہنا ہے کہ بٹ کوائن کے سرمایہ کاروں کے لیے جنہوں نے اپنی سرمایہ کاری کی قدر میں زبردست اضافہ دیکھا ہے، لگژری اشیا، ڈیزائنر ہینڈ بیگ یا ہائی اینڈ واچ، کسی کے پورٹ فولیو کو متنوع بنانے کے لیے ایک واضح انتخاب ہیں۔

نوجوان گاہکوں تک رسائی

لگژری کمپنی کیرنگ کے چیف کلائنٹ اور ڈیجیٹل آفیسر گریگوری بوٹے نے ٹیکنالوجی کے حوالے سے گروپوں کی حکمت عملی کو انتظار کرنے اور دیکھنے کے بجائے ٹیسٹ اور سیکھنے کے طور پر بیان کیا ہے، انہوں نے نوجوان اور ایشیائی گاہکوں تک پہنچنے کے لیے نئی ٹیکنالوجیوں کو اپنانے پر زور دیا۔

کیرنگز اسٹار لیبل، گچی نے 2022 سے امریکا میں اپنی زیادہ تر مصنوعات کے لیے 10 کرپٹو کرنسیوں کے ذریعہ خریداری کا آپشن فراہم کیا ہے۔

’پرنٹیمپس‘ اپنی کرپٹو ادائیگی سروس کو نیو یارک شہر تک بڑھانے کے لیے کام کر رہا ہے، جہاں یہ مارچ میں وال اسٹریٹ ڈسٹرکٹ میں ایک ملٹی برانڈ ریٹیل اسٹور کھولنے کا ارادہ رکھتا ہے۔

2021 کے اواخر میں بٹ کوائن کے عروج کی وجہ سے لگژری برانڈز نے ابتدائی طور پر دلچسپی کا اظہار کیا، جس کی قیادت اس وقت ایل وی ایم ایچ کے پرتعیش برانڈ فریڈرک ارنالٹ کے ساتھ ساتھ گوچی نے کی تھی، جس نے اگلے سال امریکا میں کچھ خریداریوں کے لیے کرپٹو کرنسی میں ادائیگیاں قبول کیں۔

حال ہی میں لگژری خریداری کرنے کے لیے ڈیجیٹل اثاثوں کا استعمال کرنے والی با اثر کاروباری خاتون یونیس وونگ جنہیں ’یونی کورن‘ کے نام سے جانا جاتا ہے، نے کہا کہ اس سال کئی مہنگی گھڑیاں خریدنے کے لیے کرپٹو کرنسی کا استعمال کیا، ان کی خریدی گئی گھڑیوں میں آڈیمارس پگوئٹ رائل اوک ماڈل بھی شامل ہے۔

تاہم یونیس وونگ روایتی ریٹیل اسٹورز اور فروخت کے معمولات کو نظر انداز کرنے کو ترجیح دیتی ہیں اور ان کا کہنا ہے کہ وہ کسٹمر سے قریبی تعلقات قائم کرنے کے خواہاں برانڈز کی طرف راغب ہونے میں دلچسپی نہیں رکھتیں۔