وزیر اطلاعات پنجاب عظمیٰ بخاری نے کہا ہے کہ ڈی چوک احتجاج تحریک انصاف کی آخری ناکام بغاوت تھی، انتشاری ٹولہ دوبارہ اسلام آباد کارخ کرنےکی غلطی نہیں کرے گا۔

وزیر اطلاعات پنجاب عظمی بخاری نے اپنے ایک بیان میں واضح کیا ہے کہ تحریک انصاف کی موجودہ لیڈرشپ بزدلی کے آخری درجے پر فائز ہے، یہ لوگ اپنی ذلت اور بدنامی کو جعلی خبروں اور افواہوں کے پیچھے چھپا رہے ہیں۔

انہوں نے کہا کہ شدت پسند اور انتشاری ٹولہ دوبارہ اسلام آباد کا رخ کرنے کی غلطی نہیں دہرائے گا، جتھوں کے ذریعے وفاق پر چڑھائی سے این آر او نہیں ملتے۔

ان کا کہنا تھا کہ کارکنوں کو چھوڑ کر بھاگنے والے اب کس منہ سے کارکنوں کا دم بھر رہے ہیں، پی ٹی آئی کے کارکنوں کے اصل مجرم علی امین گنڈا پور اور بشریٰ بی بی ہیں۔

صوبائی وزیر اطلاعات نے کہا کہ پوری دنیا کے میڈیا نے دیکھا علی امین گنڈا پور اور بشریٰ بی بی کی گاڑیوں پر انہیں کے کارکنوں نے ڈنڈے مارے اور پتھراؤ کیا۔

ان کا مزید کہنا تھا کہ بانی پی ٹی آئی اور ان کی جماعت کو ختم کرنے کے لیے بشری بی بی کافی ہے۔