توشہ خانہ کیس 2 میں بانی پاکستان تحریک انصاف ( پی ٹی آئی) عمران خان اور ان کی اہلیہ بشریٰ بی بی پر آج بھی فرد جرم عائد نہ ہوسکی، سابق خاتون اول عدالت پیش نہیں ہوئیں جس پر عدالت نے آئندہ سماعت پر غیر حاضری کی صورت میں ان کی ضمانت خارج کرنے کا نوٹس جاری کردیا ۔

اڈیالہ جیل میں اسپیشل جج سینٹرل شاہ رخ ارجمند نے بانی پی ٹی آئی عمران خان اور بشریٰ بی بی کے خلاف توشہ خانہ کیس 2 کی سماعت کی تاہم بشری بی بی عدالت پیش نہ ہوئیں اور ایک روزہ حاضری معافی کی درخواست دائر کردی۔

عدالت نے طبی سرٹیفکیٹ کی بنیاد پر بشریٰ بی بی کی ایک روزہ حاضری سے استثنی کی درخواست منظور کرلی تاہم عدالت نے ملزمہ بشری بی بی کو آئندہ سماعت پر پیش ہونے کی ہدایت کی اور آئندہ سماعت پر عدم حاضری کی صورت میں ملزمہ کی ضمانت خارج ہونے کا نوٹس جاری کردیا۔

عدالت نے قرار دیا کہ آئندہ سماعت میں ملزمہ کی عدم حاضری پر ضمانتی مچلکے ضبط کر لیے جائیں گے،عدالت نے کیس کی سماعت اکیس نومبر تک ملتوی کردی۔

مزید کے لیے کلک کریں

پس منظر

یاد رہے کہ 5 نومبر کو عدالت نے توشہ خانہ 2 کیس میں آئندہ سماعت پر بریت کی درخواستوں پر دلائل مکمل کرنے کی ہدایت کی تھی۔

12 ستمبر 2024 کو توشہ خانہ ٹو کیس کی تحقیقات کے لیے ایف آئی اےکی تین رکنی جوائنٹ انویسٹی گیشن ٹیم (جے آئی ٹی) تشکیل دے دی گئی تھی۔

نیب ترامیم کے حوالے سے سپریم کورٹ کے فیصلے کے بعد احتساب عدالت نے بانی پاکستان تحریک انصاف (پی ٹی آئی) عمران خان اور بشریٰ بی بی کے خلاف توشہ خانہ ٹو ریفرنس نیب سے ایف آئی اے کو منتقل کردیا تھا۔

قبل ازیں، عدالت نے توشہ خانہ 2 ریفرنس کا ریکارڈ اسپیشل جج سینٹرل کی عدالت کو منتقل کرنے کا حکم دیا تھا۔

جبکہ 13جولائی کو نیب نے عمران خان اور ان کی اہلیہ کو عدت نکاح کیس میں ضمانت ملنے کے فوری بعد توشہ خانہ کے ایک نئے ریفرنس میں گرفتار کرلیا تھا۔

نیب کی انکوائری رپورٹ کے مطابق نیا کیس 7 گھڑیوں سمیت 10 قیمتی تحائف خلاف قانون پاس رکھنے اور بیچنے سے متعلق ہے۔