محکمہ منصوبہ بندی و ترقیات سندھ نے آئندہ مالی سال 26-2025 میں صوبائی محکموں میں نئے ملازمین کو بھرتی کرنے سے روک دیا۔

گزشتہ تین سالوں میں ترقیاتی و غیر ترقیاتی بجٹ سےخریدی گئی نئی گاڑیوں کی بھی تفصیلات طلب کرلی۔

ڈان نیوز کے مطابق آئندہ مالی سال میں صوبائی محکموں کو نئی بھرتیوں کے علاوہ نئے فرنیچر، نئی گاڑیاں، نئی مشینری، نئے ایئر کنڈیشن کے لیے پالیسی گائیڈ لائن جاری کردی گئی، محکمہ منصوبہ بندی وترقیات نے صوبائی محکموں کو دو صفحات پر مشتمل پالیسی گائیڈ لائنز جاری کیں۔

محکمہ منصوبہ بندی و ترقیات نے تمام صوبائی محکموں سے رواں ماہ کے آخر تک تفصیلات طلب کرتے ہوئے گزشتہ تین برسوں میں منظور شدہ پوسٹوں کی تفصیلات بھی طلب کرلیں۔

پالیسی گائیڈ لائن کے مطابق عوامی خدمات کے لیے ناگزیر پوسٹوں پر مجبوری میں نئے ملازمین بھرتی کیے جائیں جب کہ صوبائی محکمے ان پوسٹوں کی تفصیلات ارسال کریں جن کی ضرورت نہیں ہے۔

محکمہ منصوبہ بندی و ترقیات نے صوبائی محکموں سے گزشتہ تین برسوں میں ترقیاتی و غیر ترقیاتی بجٹ سے خریدی گئی نئی گاڑیوں کی تفصیلات بھی طلب کرتے ہوئے کہا کہ ناکارہ قرار دی گئی گاڑیوں کی جگہ جو نئی گاڑیاں خریدی گئیں ان کے موٹر وہیکل انسپیکٹر کے سرٹیفکیٹ فراہم کیے جائیں۔

پالیسی گائیڈ لائن میں مزید کہا گیا کہ جو اشیا خریدی جائیں وہ حقیقی مارکیٹ قیمت پر ہی خریدی جائیں، اس کی تصدیق کے لیے دستاویزات فراہم کیے جائیں۔