شہباز شریف خصوصی دعوت پر30 تا 31 اکتوبرتک قطر کا دورہ کریں گے، دفتر خارجہ
وزیر اعظم شہباز شریف امیر قطر شیخ تمیم بن حمد الثانی کی خصوصی دعوت پر 30 تا 31 اکتوبر تک قطر کا دورہ کریں گے۔
ترجمان دفتر خارجہ کی جانب سے جاری بیان کے مطابق دوحہ میں وزیر اعظم شہباز شریف قطر کے امیر شیخ تمیم بن حمد کے علاوہ قطری وزیر اعظم اور وزیر خارجہ سے بھی ملاقاتیں کریں گے، جس میں دوطرفہ تجارت اور سرمایہ کاری میں تعاون بڑھانے پر تبادلہ خیال کیا جائے گا۔
وزیراعظم شہباز شریف قطر انویسٹمنٹ اتھارٹی اور قطر بزنس مین ایسوسی ایشن کے وفود کو پاکستان میں سرمایہ کاری کے لیے راغب کریں گے۔
شہباز شریف پاکستان کی ثقافتی ورثے کے حوالے سے منظر نمائش کا بھی افتتاح کریں گے، یہ نمائش پاکستان کے بھرپور ثقافتی ورثے اور پاکستان اور قطر کے درمیان عوام سے عوام کے گہرے روابط کو اجاگر کرے گی۔
واضح رہے کہ گزشتہ روز وزیراعظم شہباز شریف ریاض میں 2 روزہ فیوچر انویسٹمنٹ فورم میں شرکت کے لیے سعودی عرب پہنچے تھے، جہاں شہباز شریف اور سعودی ولی عہد محمد بن سلمان کے درمیان ملاقات ہوئی تھی، جس میں دو طرفہ تعاون مزید بڑھانے پر اتفاق کیا گیا تھا۔
شہباز شریف نے بین الاقوامی مالیاتی اداروں سے متعلق معاملات پر سعودی عرب کی پاکستان کی حمایت پر محمد بن سلمان کا شکریہ ادا کیا تھا۔
وزیراعظم نے خادم حرمین شریفین شاہ سلمان بن عبدالعزیز کے لیے نیک خواہشات کا اظہار کیا تھا اور ان کی صحت و تندرستی کے لیے دعا کی تھی، شہباز شریف نے ان کی اور ان کے وفد کی پرتپاک مہمان نوازی پر بھی ولی عہد اور سعودی عرب کا شکریہ ادا کیا تھا۔