وزیراعظم شہباز شریف نے کہا ہے کہ ٹیکس اور محصولات کے نظام کو مؤثر بنانے کے لئے جدید ٹیکنالوجی کا استعمال انتہائی اہم ہے۔

اسلام آباد میں وزیراعظم شہباز شریف کی زیر صدارت فیڈرل بورڈ آف ریونیو ( ایف بی آر) میں اصلاحات کی پیشرفت کے حوالے سے اجلاس منعقدہ ہوا۔

شہباز شریف نے ہدایت کی کہ ایف بی آر کے افسران کی پیشہ ورانہ استعداد میں اضافہ اور اسے مؤثر طور پر بروئے کار لانے کے لیے اقدامات اٹھائے جائیں۔

انہوں نے ٹیکس دہندگان کو دوستانہ ماحول فراہم کرنے اور پاکستان ریونیو آٹومیشن لمیٹڈ کی تعمیر نو کے لیے لائحہ عمل تشکیل دینے کی بھی ہدایت کی۔

وزیراعظم شہباز شریف نے کہا کہ ملک میں ٹیکس اور محصولات کے نظام کو مؤثر بنانے کے لیے جدید ٹیکنالوجی کا استعمال انتہائی اہم ہے۔

ان کا مزید کہنا تھا کہ ملک میں سمگلنگ کی روک تھام کے نظام کو مزید مؤثر بنانے کے لیے جامع اقدامات کیے جائیں۔