لاہور ہائی کورٹ (ایل ایچ سی) کو جمعرات کو بتایا گیا کہ پاکستان تحریک انصاف (پی ٹی آئی) کے بانی چیئرمین عمران خان کی اہلیہ بشریٰ بی بی کے خلاف کل 12 فوجداری مقدمات درج ہیں۔

ڈان اخبار کی رپورٹ کے مطابق ایڈیشنل ایڈووکیٹ جنرل ستار ساحل نے عدالت میں رپورٹ پیش کرتے ہوئے کہا کہ بشریٰ بی بی کے خلاف 12 پولیس مقدمات درج ہیں جن میں سے 11 راولپنڈی اور ایک اٹک میں ہے۔

وفاقی حکومت کے وکیل نے یہ بھی بتایا کہ قومی احتساب بیورو (نیب) نے ان کے خلاف توشہ خانہ سے متعلق مقدمہ درج کیا ہے۔

حکومتی رپورٹس کی روشنی میں جسٹس طارق سلیم شیخ نے بشریٰ بی بی کی درخواست نمٹا دی جس میں ان کے خلاف درج تمام نامعلوم مقدمات کی تفصیلات طلب کی گئی تھیں۔

درخواست میں موقف اختیار کیا گیا تھا کہ درخواست گزار کو بری ہونے، ضمانت کی توثیق اور ان کے خلاف درج سابقہ ​​تمام مقدمات میں سزاؤں کی معطلی کے بعد کسی فوجداری مقدمے میں ضرورت نہ ہونے کے باوجود غیر قانونی طور پر قید کیا گیا، اگر درخواست گزار کو ان کے علم میں لائے بغیر کسی اور معاملے میں گرفتار کیا گیا تو یہ انصاف کی پامالی کے مترادف ہوگا۔

درخواست گزار کے وکیل نے عدالت سے استدعا کی کہ مدعا علیہان کو حکم دیا جائے کہ وہ ان کے موکل کے خلاف خفیہ اور نامعلوم مقدمات کی تازہ فہرست پیش کریں اور اس طرح کے کسی بھی کیس میں ان کی گرفتاری کو روکنے کا حکم جاری کریں۔