جہاں اعلیٰ عدلیہ میں ججوں کی تعداد بڑھانے کے لیے قانون سازی سمیت 5 پرائیویٹ بلوں کا ایک سیٹ آئندہ اجلاس میں قومی اسمبلی میں پیش کیے جانے کی توقع ہے وہاں چیف جسٹس آف پاکستان (سی جے پی) قاضی فائز عیسیٰ نے جوڈیشل کمیشن پاکستان رولز 2024 پر غور کرنے کے لیے کا جے سی پی کا اجلاس 13 ستمبر کو طلب کرلیا۔

ڈان اخبار کی رپورٹ کے مطابق جوڈیشل کمیشن پاکستان اعلیٰ عدلیہ میں ججوں کی ترقی پر غور کرے گی اور اگر 13 ستمبر کو ایجنڈا مکمل نہیں ہوا تو اس معاملے پر بحث اگلے دن تک جاری رہ سکتی ہے۔

اجلاس میں سپریم کورٹ کے سینئر ترین جج جسٹس سید منصور علی شاہ، جسٹس منیب اختر، جسٹس یحییٰ آفریدی، جسٹس امین الدین خان، سپریم کورٹ کے سابق جج جسٹس منظور احمد ملک، وزیر قانون اعظم نذیر تارڑ، اٹارنی جنرل پاکستان (اے جی پی) منصور عثمان اعوان اور پاکستان بار کونسل (پی بی سی) کے نمائندے اختر حسین بھی شرکت کریں گے۔

کمیشن کی آخری میٹنگ 3 مئی کو ہوئی تھی، لیکن یہ بے نتیجہ رہی کیونکہ وزیر قانون نے کمیشن کو وفاقی حکومت کے اعلیٰ عدلیہ کے ججوں کو ترقی دینے کے موجودہ عمل کو تبدیل کرنے کے لیے آئینی ترامیم متعارف کرانے کے ارادے سے آگاہ کیا۔

کمیٹی کی سفارشات تجویز کرتی ہیں کہ جے سی پی کے چیئرپرسن (سی جے پی) سپریم کورٹ کی ہر اسامی کے لیے تین نام آگے بھیجیں اور اس آسامی کے خالی ہونے سے 15 دن قبل غور و خوض کے لیے جوڈیشل کمیشن پاکستان کی میٹنگ بلائیں گے۔

مزید کے لیے کلک کریں

اسی طرح ہائی کورٹس کے چیف جسٹسز کی تقرری کے لیے چیئرپرسن اسامی خالی ہونے سے کم از کم ایک ماہ قبل متعلقہ ہائی کورٹ کے پانچ سینئر ترین ججوں کے حوالے سے غور کرنے کے لیے ایک میٹنگ بلائیں گے، ہائی کورٹ کے جج کی تقرریوں کے لیے، چیئرپرسن اسامی سے 60 دن پہلے متعلقہ سلیکشن کمیٹی سے نامزدگیوں کی درخواست کرے گا اور اسامی سے 30 دن قبل غور و خوض کے لیے کمیشن کا اجلاس بلائے گا۔

سپریم کورٹ (ججوں کی تعداد) ایکٹ 1997 میں ترمیم کے لیے مسلم لیگ (ن) کے دانیال چوہدری کی جانب سے ایک پرائیویٹ ممبر بل قومی اسمبلی میں پیش کیا جا رہا ہے، جس کا مقصد سپریم کورٹ میں ججوں کی تعداد 17 سے بڑھا کر 22 کرنا ہے۔

آئین کا آرٹیکل 176 صدر کو سپریم کورٹ میں ججز کی تعداد کا تعین کرنے کا اختیار دیتا ہے، ججوں کی تعداد کے تعین میں لچک کی اجازت دیتا ہے۔

سپریم کورٹ کے ججوں کی موجودہ تعداد کا تعین کیسے کیا گیا اس کی تاریخ کا سراغ لگاتے ہوئے سینئر وکیل محمد اکرم شیخ نے ڈان سے بات کرتے ہوئے یاد دلایا کہ نواز شریف کی حکومت نے 1997 میں ججوں کی تعداد 17 سے کم کر کے 12 کر دی تھی۔

1997 میں سپریم کورٹ بار ایسوسی ایشن کے اس وقت کے صدر کی حیثیت سے اکرم شیخ نے حکومت کے فیصلے کو سپریم کورٹ میں چیلنج کیا تھا، نتیجتا اس وقت کے اٹارنی جنرل چوہدری محمد فاروق (مرحوم) سپریم کورٹ کے سامنے یہ بیان دینے پر مجبور ہوئےکہ حکومت قانون سازی واپس لے رہی ہے اور 17 ججوں کی اصل طاقت پر واپس جا رہی ہے۔

اکرم شیخ کا کہنا تھا کہ مستحکم جمہوریت کے لیے ایک مضبوط اور آزاد عدلیہ ضروری ہے، انہوں نے خبردار کیا کہ ججوں کی قانونی طاقت بڑھانے کی کسی بھی کوشش کو سپریم کورٹ کو بھرنے کی کوشش کے طور پر دیکھا جائے گا اور ممکنہ طور پر اس کا مقصد مخصوص نشست کے معاملے میں 12 جولائی کے فیصلے کو کالعدم کرنا ہے۔

انہوں نے دلیل دی کہ اعلیٰ عدلیہ کے ججوں کی تعداد بڑھانے کے لیے مجوزہ قانون سازی کی مشق عدلیہ کی آزادی کو مجروح کرتی ہے جس سے عدالتی احکامات کو نافذ کرنے کی اس کی صلاحیت پر سمجھوتہ ہو جائے گا، خاص طور پر 12 جولائی کے فیصلے کے تناظر میں۔

وکیل نے نوٹ کیا کہ عالمی سطح پر مقدمات کے زیر التوا ہونے کے باعث ججوں کی طاقت میں اضافہ نہیں کیا جاتا ہے، کیونکہ یہ زیادہ کارکردگی اور بینچوں کی مناسب تشکیل کے ذریعے حل کیا جا سکتا ہے، انہوں نے مزید کہا کہ چیف جسٹس کے پاس ہمیشہ ایڈہاک جج کو شامل کرنے کا اختیار ہے، ایڈہاک ججز وہ ہوتے ہیں جو سیاسی مقدمات کی سماعت میں شامل نہیں ہوتے لیکن مقدمات کو نمٹانے میں مدد کے لیے مقرر کیے جاتے ہیں۔

دریں اثنا، ایک باخبر ذرائع نے بتایا کہ سپریم کورٹ نے پانچ ہائی کورٹس کے چیف جسٹسوں سے درخواست کی ہے کہ وہ اپنی متعلقہ عدالتوں میں ایڈیشنل ججوں کے طور پر تقرری کے لیے ممکنہ امیدواروں کی شناخت کریں، اس کا مقصد ہر ہائی کورٹ میں کم از کم پانچ اسامیوں کو جلد از جلد پُر کرنا ہے۔