پاکستان

قومی اسمبلی کا اجلاس، مقامی حکومت ترمیمی بل منظور

بل میں دانیال چوہدری کی جانب سے متعارف کرائی گئی ترامیم کو ایوان نے کثرت رائے سے منظور کیا، سنی اتحاد کونسل کے اراکین نے کہا کہ حکومت اس بل کی آڑ میں انتخابات نہیں کرانا چاہتی۔

قومی اسمبلی کے اجلاس میں اسلام آباد مقامی حکومت ترمیمی بل 2024 منظور کر لیا گیا جس کے تحت جنرل نشستوں پر 9 امیدوار براہ راست منتخب ہوں گے۔

ڈان نیوز کے مطابق اسپیکر ایاز صادق کی زیر صدارت اجلاس میں وزیر قانون اعظم نذیر تارڑ نے ترمیمی بل ایوان میں پیش کیا۔

دانیال چوہدری کی جانب سے متعارف کرائی گئی ترامیم کو ایوان نے کثرت رائے سے منظور کیا جبکہ سنی اتحاد کونسل کے اراکین نے کہا کہ حکومت اس بل کی آڑ میں انتخابات نہیں کرانا چاہتی۔

اسلام آباد سے منتخب نمائندے طارق فضل چوہدری اور راجا خرم نواز نے کہا کہ بہتر نظام لانے میں اگر کچھ تاخیر ہوتی ہے تو اس میں کوئی حرج نہیں۔

اجلاس کے دوران ریاست بنام مبارک ثانی پر قائمہ کمیٹی کی رپورٹ پیش کی گئی، جس کی متفقہ طور پر منظوری دے دی گئی۔

ایم کیو ایم پاکستان کے ڈاکٹر فاروق ستار نے نجکاری کمیشن ترمیمی بل 2024 پر قائمہ کمیٹی برائے نجکاری کی رپورٹ پیش کی۔

اجلاس میں وزارت آئی ٹی نے پاکستان ٹیلی کمیونیکیشن اتھارٹی (پی ٹی اے) میں رجسٹرڈ وی پی اینز کی تفصیلات ایوان میں پیش کیں، جس کے مطابق ملک میں 1422 کمپنیوں کے ساڑھے 20 ہزار وی پی اینز رجسٹرڈ ہیں۔

منکی پاکس کے بارے میں وفاقی وزیر قانون اعظم نذیر تارڑ نے کہا کہ یہ باہر سے آنے والی بیماری ہے، اس حوالے سے ایئر پورٹس پر حفاظتی انتظامات کیے جائیں۔