اسٹریمنگ ویب سائٹ ایچ بی او نے ’ہاؤس آف ڈریگن‘ کے دوسرے سیزن کا ٹریلر جاری کرتے ہوئے سیریز کو آئندہ ماہ ریلیز کرنے کا اعلان کردیا۔

’ہاؤس آف ڈریگن‘ سیریز کے پہلے سیزن کو اگست 2022 میں ریلیز کیا گیا تھا اور تقریبا دو سال کے وقفے کے بعد اب اس کا دوسرا سیزن جون کے وسط میں ریلیز کردیا جائے گا۔

’ہاؤس آف ڈریگن‘ سیریز شہرہ آفاق سیریز ’گیم آف تھرونز‘ کی پری کوئل ہے، یعنی اس سیریز کی کہانی گیم آف تھرونز کی کہانی شروع ہونے سے 200 سال قبل کی ہے۔

’ہاؤس آف ڈریگن‘ کی کہانی بھی جارج آر آر ماٹن نے لکھی ہے، جنہوں نے گیم آف تھرونز کی کہانی لکھی تھی۔

مزید کے لیے کلک کریں

’ہاؤس آف ڈریگن‘ کے ہہلے سیزن میں 8 قسطیں شامل تھیں اور پہلے سیزن کی کہانی کا اختتام ایک اہم شخصیت کی موت پر ہوا تھا اور دوسرے سیزن کی کہانی وہیں سے شروع ہوگی۔

’ہاؤس آف ڈریگن‘ کی کہانی ویسٹرس نامی ایک خیالی دنیا پر مبنی ہے جو کہ گیم آف تھرونز کے واقعات سے 200 سال قبل کی دنیا ہے اور پہلے سیزن میں ایک بادشاہ کی موت کے بعد متحد ریاستوں کے درمیان جنگ چھڑنے کا عندیہ دیا گیا تھا۔

’ہاؤس آف ڈریگن‘ کے دوسرے سیزن کے ٹریلر میں ٹارگیرینز نامی 7 متحد ریاستوں کے درمیان جنگ کے آغاز کو دکھایا گیا ہے۔

ٹریلر سے معلوم ہوتا ہے کہ سیریز کے دوسرے سیزن میں ریاستیں ایک دوسرے سے جنگ کرتی دکھائی دیں گی اور ممکنہ طور پر سیریز کا اختتام بھی تمام ریاستوں میں جنگ کے عروج پر ہوگا۔

اس بار بھی سیریز میں میٹ اسمتھ (پرنس ڈیمن ٹارگرین)اولیویا کوک (ایلینٹ ہائی ٹاور) ایم ڈی آرسی (رینیرا ٹارگرین) ایو بیسٹ (رینیرا ٹارگرین) اسٹیو ٹوسینٹ (لور کورلیس ویلاریون) فیبین فرینکل (سر کرسٹن کول) ایون مچل (ایمون ٹارگرین) اور ٹام گلن- کارنی (ایگون II ٹارگرین) کے روپ میں دکھائی دیں گے۔

دوسرے سیزن میں ابوبکر سلیم سمیت کاسٹ میں نئے اداکار بھی شامل کیے گئے ہیں، اس بار ابوبکر سلیم (ایلی آف ہل) گیل رینکن (ایلس ریورز) فریڈی فاکس (سر گیوین ہائی ٹاور) ٹو ٹیلر (لارڈ کریگن اسٹارک) اور ونسنٹ ریگن (سر رکارڈ تھورن) کے کرداروں میں نظر آئیں گے۔

’ہاؤس آف ڈریگن‘ سیزن 2 کو 16 جون کو ریلیز کرنے کا اعلان کیا گیا ہے اور اس بار سیزن میں 6 قسطیں ہوں گی۔